Jowai, Nohprah 06: Ka Khooid Ya ka Wah Myntdu (KYM) ha ka jingïakhun ka jong ka ban pynneh, pynbha ïa ka Myntdu kaba dei tang ma ka ba pynbiang Um bam ïa ki nongshong shnong bad ki nongrep ha Jowai bad ki shnong kiba marjan talawiar ka Myntdu.
Ha kine ki sngi kiba la dep ka KYM ka la ïoh ïa ka jingujor na kiba bun ki trai shnong ïa ka jingkhlong pathar ki JCB, ki trok dumper ïa ki maw ka khyndew na ka wah Mynkrem na ka wah Myntdu, kiba shna ïa ka Jowai Bypass narud ka Myntdu.
Kumta ka KYM da ka jingsngewkhia ka la leit peit sha katei ka wah bad ka la lap shisha ba ïa kitei ki Maw ka khyndew la khlong beaiñ bad kaba pynkyndit shuh shuh ïa ka KYM ba ïa kitei ki maw, ka khyndew la siang ha katei ka surok heh ka Jowai by pass.
Kane ka jingleh pathar ka office u EE PWD (Rds) Jowai Central division ka long kumba pynïap lypa ïa ka jingim ki briew bad ki dohum kiba thrang ban ïoh ïa ka Um kaba khuid. Shuh shuh ka la long kumba la leh khnang ban pyrshah ïa ka Hukum u DC WJHD, ïa ka Hukum u CFO JHADC kaba la khang pyrshah ban khlong maw khlong shyiap na ka wah Myntdu khamtam da ki truck JCB bad dumper.
Kaba pynlyngngoh shuh shuh ïa ki riewrangbah ba kumno ka PWD ka siang maw bad khyndew da kiba na ka wah Myntdu. Hato ïa katei ka surok heh kaba da ki phew klur lah hi ban siang surok tang da ki maw ka khyndew na ka wah. Mano ban bahkhlieh lada ka Um ba sam na PHE kan kylla khyndew bad ka wah Myntdu Mynkrem kin jah noh?
Kumta halor kane ka jingshah batbor ka Myntdu, ka KYM ka kyrpad ïa u DC, u DFO WJHD, u CFO ka JHADC, ka Meghalaya State Pollution Control Board, Shillong ban pynshitom tyngeh ïa ki Engineer ka PWD (Rds) Jowai Central division katkum ki Aiñ ïa da Mariang, ïada Um bad ki Wah.
Ha kane ka jingleit peit la don ryngkat ka kong B. Blah MCS, ADC WJHD, u Bah H. Nengnong EE PWD (Rds) Jowai Central division, u H. Passah na ka office CFO JHADC, Khroo L Pariat President KYM bad ki riew rangbah ka shnong Jowai.
