Khliehriat, Nohprah, 6: Ka Federation of Khasi Jaiñtia and Garo People (FKJGP) East Jaiñtia Hills District Unit ka la pynpaw ïa ka jingsngew khia halor ka jingbym don ka tnat treikam kaba pura jong ka tnat Jngohkai Pyrthei ha East Jaiñtia Hills District.
Halor kane, ki nongïalam ka seng ha ka sngi Thohdieng ki la leit buh da ka jingthoh hakhmat u Deputy Commissioner ka East Jaiñtia Hills District bad kyrpad ba un sngewbha ban leh noh kham kloi ban thung ïa u heh sorkar u ban peit ïa ka ophis Tourism.
Katkum ka jingthoh ba la phah sha u Deputy Commissioner ba la soi kyrteng da u President FKJGP East Jaiñtia Hills District u Bah Deihok Sumer bad u General Secretary u Bah Emlang Sutnga, ka seng ka la pynpaw ba ka tnat Tourism ka dei kawei na ki tnat treikam jong ka Sorkar kaba donkam bha khamtam ha kaba kyntiew ïa ka ïoh ka kot jong ki paidbah. Na kata ka daw lada ka district ka don da u heh sorkar u ban peit ban jngoh bad ban treikam pura hapoh ka district kan ïarap shibun eh ha kaba kyntiew ïa ki kam jngohkai pyrthei bad kan ïarap ruh ha ka ban ai jingtip kiba ïadei bad ki kam ban kyntiew jngohkai pyrthei ha ka district.
Ka jingdon ka tnat treikam ba pura kan ïarap ïa ki paidbah jong ka district ba kin ïoh jingtip, khamtam eh kito kiba wan jngohkai sha East Jaiñtïa Hills District khnang ba kin tip shphang ki jaka kiba itynnad, ki jaka sah bad kiwei kiwei ki jingtip.
“Ka jingbym don u heh Sorkar u ban peit ïa ka tnat jngohkai pyrthei ka wanrah bun ki jingduh jingmyntoi ha kaba ïadei bad ki Tourism Campaign, ka jingïatreilang ne ka patnership ban ïalam lynti ïa ki nongjngohkai pyrthei” la bynrap ha ka shithi na ka seng.
Ka jingbym lah ban treikam pura ka tnat napoh ka district ka buh jingeh ïa ki paidbah ka district namar haba don kino kino ki kam kiba donkam kiba ïadei bad ka tnat Tourism lada donkam ban wad jingtip ïa kiei kiei, ki briew ki hap ban leit shaduh Jowai, kata sha West Jaiñtia Hills District.
“Ka long kaba sngewsih ban ong ba ka East Jaiñtia Hills District ka dei ka district kaba la ïoh ïa ka district ba pura mynta la bun snem, hynrei haba ngi leit wad jingtip pat ïa kiei kiei kiba ïadei bad ki kam ki jam, ïa ngi la phah kylla sha West Jaiñtia Hills District bad kane baroh ka dei namarba ka tnat jngohkai pyrthei kam pat don satia ki heh sorkar kiba treikam pura napoh ka district,” la bynrap shuh shuh ha ka shithi ba la phah sha u Deputy Commissioner.
Ka seng ka la kyrpad ïa u Deputy Commissioner ba un shimkhia kham kloi ïa kane ban wanrah noh da ki heh sorkar ban dup lah ban treikam pura napoh ka district bad ka jinglah ka tnat ban treikam pura napoh ka district kan wanrah bun ki jingmyntoi ïa ki paidbah ha kiba bun ki liang ban kyntiew ïa ka kam jngohkai pyrthei hapoh ka tnat ne ka district bad kane ka ïarap ruh ban kyntiew ïa ka khaïi ka pateng bad ka ïoh ka kot jong ki nongshongshnong jong ka district bad ruh kan ïarap ym tang ïa ki nongshong shnong jong ka district hynrei kan ïarap shikatdei eh ïa kito kiba wan na kiwei pat ki jaka kum ki nongjngohkai pyrthei kiba wan sha East Jaiñtia Hills District.
Ka East Jaiñtia Hills District, watla ka la kynjoh 12 snem shiteng ha ka jingïoh la ka jong ka district, ka dei pat kawei na ki district kaba la paw bha, ym tang ha ka jingdon ki marpohkhyndew bad ha ka jingdon bun ki kam ha ka khaïi ka pateng, hynrei ka la paw bha ruh ha ka jingdon ki jaka jngohkai pyrthei kiba itynnad bad ka la sdang ruh ban kiew ha ka kam jngohkai pyrthei.
