Khliehriat, Nohprah, 6: U Deputy Commissioner jong ka East Jaiñtia Hills District ha ka hukum ba la pyllait paidbah ha ka sngi Thohdieng u la mana bad bthah ïa ki kali kiba ïaid na ka surok National Highway-6 na East Jaiñtia Hills District khnang ban lait na ki jingma, jingmynsaw namarba mynta ka jingpyntrei ïa ka surok ka dang ïaid shaid shaid.
Ki bor synshar district ki ladep pyntreikam ruh ïa ka hukum bad ki kyndon aiñ jong ka 163 Bharatiya Nagarik Suraksha Sanhita 2023 bad kane ka hukum ka dang treikam haduh mynta.
Ki bor district ki la mana ïa ki kali heh ban ïaknieh ïaid ha surok NH-6, kata naduh Tuber ter ter shaduh Ratacherra. La mana ruh ban ym ñiah stet ïa ki kali khamtam ki kali heh khnang ban ym buh jingma ïa ki briew kiba ïaid ha lynti bad ïa ki kali rit kiba ïaid na katei ka surok.
Ha surok NH-6 ha East Jaiñtia Hills District, ki kali heh ki shu ieng ha surok kata naduh ka por 9:00 baje mynstep haduh ka por 3:00 baje noh sngi namar ka jingbym pat shah ban ïaid ki kali ha ka surok NH-6 ha ka thaiñ Narpuh kata naduh Lumshnong shaduh Malidor na ka daw ba ka jingpyntrei ïa ka surok ka dang ïaid shaid shaid.
Ki don ki jaka ba ki kali ki hap ban ïaid tang shiliang ka surok. Ka ka hukum kaba wan na ophis jong u Deputy Commissiner ka dei ka jingmana ïa ki kali heh ynda ki la dei ka por ban ïaid kata naduh ka por janmiet ba ym dei ban niah stet ïa ki kali khnang ban nym buh jingma ïa kiwei pat ki kali.
Kane ka jingbym shah ïaid ki kali ha ka por kaba naduh mynstep haduh janmiet ka dei halor ka jingthmu ba ki nongtrei kiba pyntrei ïa ka surok kin ïoh ka lad ban trei khlem ka jingpynwit jong ki kali ba ïaid ba ieng bad ruh ban dup lah ban pyndep kham kloi ïa ka kam ban maramot bad ban shna bha ïa surok bad ïa ki nala tuid um kiba heh ha ka thaiñ Narpuh.
Ka ophis u DC ka la pynmih ruh ïa kawei ka hukum kaba kyntu ïa kiba ñiah kali ba ki dei ban kynmaw ruh ban peit ïa ki Signboard bad ki jingthoh Night Visibility ba la buh ha surok khamtam ha ki jaka ba don ki jingkieng, ki nala tuid um kiba heh bad ha ki jaka ba don ki thliew ha surok khnang ban lait na ka jingma, jingmynsaw.
