Shillong, Nohprah, 01: Ki samla pule jong ka North Eastern Hill University (NEHU) ki la rai ban ym ailad daleilei ruh ïa u Vice Chancellor u Prof Prabha Shankar Shukla ban rung shapoh ka phyllaw jong ka skulbah ban bteng biang ïa ka jingtreikam ha ka Lah Sngi u Blei.
Ïa kane la pyntip da u President jong ka NEHUSU u samla Sandy Sohtun ha ka sngi u Blei haba jubab ïa ka rai jong u Vice Chancellor ban bteng biang ïa ka jingleit treikam wat hapdeng ka jingïakhih ban dawa weng ïa u na ka shuki.
“Ngin sa peit kaei ka ban jia lashai bad ngin ym ailad ïa u (Prof Shukla) ban rung shapoh ka Campus. Ngin khangdam bad ngin ap pahara ha ki khyrdop jong ka skulbah,” ong u samla Soht un.
U la ong ba ka Ministry of Education ka la aibor ban pynjlan sa 15 sgni ïa ka komiti tohkit kaba arngut ki dkhot ban pynlong ïa ka jingtohkit halor ki jingkynnoh pyrshah ïa u VC hynrei kam shym la pynmih pat ïa ka shithi kaba kdew ba yn leh eiei pyrshah ïa u.
“Lada ka jingtohkit ka dang ïaid pyrshah ïa u (Prof Shukla), ngi khmihlynti ba kan don ka jingpynmih ïa ka hukum ban sospon hynrei ka Ministry kam shym la leh eiei ha kaba ïadei bad kane,” la ong u samla Sohtun.
“Lada u VC u pyrshang ban wan sha ophis, ngin sa thoh ruh sha ka Ministry namarba ngi khmihlynti ba kan don kano kano ka jingpynshitom ba shipor pyrshah ïa u namarba baroh ki kynhun ki la ieng pyrshah ba un dang wan phai sha ka University,” u la bynra.
Ka NEHUSU ryngkat bad ka KSU NEHU Unit ki la pynsangeh shwa shipor ïa ka jingïakhih shah thngan bad ki la kren da kaba shai sha ka kynhun tohkit ba kin ym lah satia ban pdiang daleilei ruh em ïa ka jingwan phai jong u Prof. Shukla.
Dang shen, u Prof. Shukla u la pan bor pahara na ka Sorkar Pdeng khnang ba un dup lah ban leit biang sha ka ophis treikam ha ka 2 tarik Nohprah.
Ha ka shithi ba u la phah sha u Principal Secretary in-charge Higher Education, ka Sorkar India, u Prof Shukla u la ong, “ka shuti jong nga kan kut ha ka 29.11.2024, bad ngan bteng biang ïa ka jingleit trei ha NEHU ha ka 02.12.2024.”
U la kynnoh, “nga la ïoh jingtip ba ki don katto katne ki runar na ki kynhun bapher bapher ka University, lyngba u In Charge Vice Chancellor, ki la pynïaid be-aiñ hapoh ka Campus, ka jingtreikam ba manla ka sngi bad pynmih ruh ïa ki hukum ba khlem ïoh jingbit bad ki jingpyntip.”
“Halor ki jinglong jingman kiba jia ha jaka pule jong ka NEHU, nga kyrpad ban pynbiang ïa ki bor pahara na ka Sorkar Pdeng, namarba ka jingpahara ba la ai da ka Sorkar Jylla kam long kaba biang. Kane ka jingpynbiang bor pahara kan pynthikna ym tang ïa ka jingshngaiñ jong nga hynrei kan ïarap ruh ïa ka jinglong jingman ha baroh kawei ka jaka pule jong ka NEHU bad ki nongtrei jong ka,” la pynpaw VC ha ka shithi jong u.
U la pyntip ba u la phah ïa ka jubab na ka bynta baroh saw tylli ki jingkylli ba la dawa da ka Ministry of Education ha ka 23.11.2024.
Haba ai ïa ka kaiphod kaba bniah halor ka jingjia, u Prof Shukla u la ong, “ka NEHU Students’ Union (NEHUSU), ba la kyrshan da ka NEHU Teachers’ Association (NEHUTA) ba la khlieh da u Prof. Lakhon Kma ki la pynthud hapoh ka jaka pule naduh ka 25 tarik, Risaw, 2024.”
U la teipop ruh ba NEHUTA ka la thaw ka jingkulmar shwa ban sdang ka jingïalang kaba 113 sien jong ka Academic Council ha ka 25 tarik, Risaw, 2024, khlem da ailad ban pynlong ïa ka jingïalang jong ka Academic Council.
Hadien kata, ki la rung jubor ha ka ophis jong u Registrar bad u Dy. Registrar da kaba beh ïa ki bad khang tala ruh ïa ki kamra treikam jong ki. Ki la rung jubor ruh ha ka kamra treikam jong u VC, ki la byrngem ïa nga bad ki la dawa ba nga dei ban wengkam mardor ïa u Registrar bad ïa u Dy. Registrar.
“Ym don uwei ruh na ka kynhun uba la ai kano kano ka jingpynpaw/ujor da ka jingthoh ban batai ïa ka daw ba dei ban weng kam ïa ki arngut ki ophisar,” u la ong.
“Watla katta ruh, nga la pyrshang ban batai ïa ki ïa ki rukom treikam ba thikna bad pynthikna ïa ki ba ngan shimkhia noh mardor ïa ka jingdawa,” u la ong shuh shuh.
Katkum ka jingdawa jong ki, nga la thung ruh ïa ki Pro-VC bad nga la pan jingmynjur na ka EC katkum ki kyndon ha ka NEHU Act 1973,” la ong u Prof Shukla bad bynrap, “Watla nga la pyrshang katba lah ban ïakynduh bad ïakren bad wan sha ka jingpynbeit, ka NEHUSU bad ka NEHUTA ki la pynjur ïa ka jingïakhih, ki la pynlong da ka ‘Dharana’ ha ka dur jong ka jingshah thngan hakhmat ka ophis jong u VC bad khang lut ïa ki khyrdop rung jong ka University. Kim shym la ai kano kano ka jingthoh ban pynlong ïa ka jingshah thngan. Nga la pyntip sha ki bor synshar District ïa ki jingjia, kynthup ïa u DC bad u SP, ryngkat bad ka DGP bad sha u Chief Secretary jong ka Jylla bad nga la pan jingïarap na ki ban pynthikna ïa ka jingshngaiñ jong ka jaka pule jong ka NEHU.
“Watla katta ruh, ki ar tylli ki kynhun ki la thombor ïa nga bad ki la byrngem ïa nga da kaba hiar thma ïa ka jaka sah jong nga,” la kynnoh u Prof. Shukla.
“Namar ki jinglong jingman ba la batai haneng bad ka jingbymsuk kaba la wanrah da ki ar tylli ki Association, ka jingtreikam jong ka NEHU ka la sangeh shisyndon. Ki nongtrei jong ka skulbah ki shah pynsangeh ban pyndep ïa ki kam jong ki bad ki sngewba kim shngaiñ ha ka jaka pule,” u la bynrap.
Katkum ka jingong jong u, ka jingsheptieng bad ka jingshah pynthut ka ktah jur ïa ka jingtreikam jong ka jaka pule.
