Shwa ban thang theh u tnga ïa ka kurim da ka umphniang sdieh dohkha, shim Sou Moto ka NCW

Shillong, Naiwieng, 20: Ka National Commisson for Women (NCW) ka la shim Sou Moto halor ka jingmynsaw jong kawei ka longkmie kaba la shah thang da ka ding ha la u jong u kurim u Dahun Dkhar ha kaba la jia ha ka shnong Niriang, Thadlaskeiñ C&RD Block.
Kum ban shu pyntip hangne ba kane ka longkmie kaba dang don mynta hapdeng ka jingshah sumar ha Shillong Civil Hospital ka dei kaba don ruh hynriew ngut ki khun.
Katkum ka jingïathuh jong ka Meikha jong kane ka longkmie ka Kong Angel Syngkon, kane ka jingjia ka la jia naduh ar bnai mynshwa hynrei kane ka longkmie kam shym la nud satia ban ïathuh ïa ka jingshisha namar ka jingsheptieng ïa u kurim uba la byrngem byrsit ïa ka hynrei ka la shu kam ba ka la thang hi ïalade.
Dei tad hadien ar bnai ba u kurim jong ka u la leit buh noh ïa ka sha iing kmie jong ka, ka la phla ha la ki jong ki bahaiing hasem ïa kane ka jingjia. Hadien kata, la pynkit noh ïa ka sha Shillong Civil Hospital na ka bynta ban ïoh ïa ka jingsumar.
Halor kane ka jingjia, ki bahaing hasem ki la ujor da ka ejahar pyrshah ïa u Dahun Dkhar ha Ummulong Police Outpost.
“Na ka NCW ngi la shim Sou Moto ïa kane ka jingjia bad ngin sa ïakren bad ka Director General of Police (DGP) ruh halor kane ka jingjia,” la ong ka dkhot jong ka NCW ka Kong Delina Khongdup ha ka jingïakren bad ki lad pathai khubor hadien ba la leit jngoh ïa ka lanot ha hospital ha ka sngi Balang ryngkat ka jingsynran lang ka Chairperson jong ka Meghalaya State Commission for Women ka Kong Ïamonlang Syiem bad ki dkhot ka Commission.
Katkum ka jingïathuh jong ka Kong Khongdup, wat i khun ba dang rit ruh i la ngat lang ha ka jingmynsaw namarba u kurim u la thnang ïa la jong ka tnga katba ka dang bah ïa i khunrit ha ka met.
Haba kylli, ka la ong ba ka Commission kan sa peit bniah ïa ki aiñ ki kyndon ba ka Sorkar kan dup lah ban ai jingïarap pisa ïa kane ka longkmie.
Ka la ïathuh ruh ba ka Commission kan kyrpad ïa ki Pulit ban kham pynkloi ïa ka jingtohkit bad ban kyrpad ruh ïa ka Kashari ban ym ai jamin khamtam eh ha kane ka por ba ka longkmie ka dang don hapdeng ka jingshitom.
“Ha ka jingïakren bad i kmie (jong ka lanot) i ong, da ka umphniang sdieh dohkha u theh nyngkong eh ha ka met jong ka lanot bad hadien kata u theh sa ka umphniang sharak. Shwa ba un theh da ka umphniang sharak ban thang da ka ding ïa ka met, u la pynsangoh shwa ïa ka khlieh jong ka longkmie ha ka kynroh kat haduh ba kam tip briew shuh,” la ïathuh ka Kong Khongdup.
“Ngan sa leit ban ïakynduh ïa ka DGP bad ngan sa pan ïa ka kaiphod na u SP ka West Jaiñtia Hills ban kham tip bniah halor kane ka jingjia namarba ngi la shim Sou Moto ïa kane ka jingjia,” la ong shuh shuh ka Kong Khongdup.
U Dr. C. Wanniang u la ïathuh ba ha ka por ba la wanrah sha hospital kane ka longkmie ka tlot bha namarba ka bam bad ka um ha ka met bad ki bynta ba la ing ha ka met ruh ki la dap da ki jakhlia namarba la shu tah da ki dawai kynbat.
U la ïathuh ba kane ka longkmie ka la leit phai da la mon lajong sha la ïing namar ka jingbym lah ban shah ïa ka jingsumar hynrei ha ka sngi Baar ka la wan phai biang sha Hospital ban shah sumar.
U ïathuh ba ka jinging jong ka met ka la long haduh 45 persen na ka bynta ka durkhmat, ka shadem bad ka tyrpeng bad katno katne na ki bynta jong ki lbong.
Haba kylli, u la ong ba kane ka longkmie kam shym la ïathuh satia ïa kaei kaba la jia ha ki doktor bad na ka liang jong ki doktor ruh kim shym la suba sniew eiei namarba ki dang pyrkhat ba ka jingjia ka dei kaba la shu jia ryngkhat. Hynrei watla katta ki bor pynïaid ka Hospital ki la shu pyntip ïa kane ka jingjia sha ki Pulit ha Police Booth kaba don ha Shillong Civil Hospital.
“Dei ha ka 7 tarik Risaw, 2024 ha ka por kumba 4 baje janmiet ka longkmie ka la ïathuh ba ka jingjia ka la jia naduh shitaïew mynshwa. Hapoh ka shitaïew ka la leit sumar dawai Khasi. U kurim jong ka, u la ïalam ruh ïa ka sha Jowai Civil Hospital hynrei ki la phah noh ïa ka sha Civil Hospital, Shillong,” la ïathuh u Dr. Wanniang.