Bun kiba la pan mining lease ban tih dewïong kat kum ka juk saian ha Jylla ong u Myntri

Shillong, Naiwieng 20 : U Myntri Sorkar bad Nongïalam ka UDP u Ma Kyrmen Shylla ha ka sngi Balang, ula pyntip ba kila don bun ngut ki briew kiba la aplai ïa ka propecting licence ne mining lease kaba pyni ba bun ki la kot bor ban sdang ïa ka jingtih dewiong kat kumka jingstad saian ha ka jaka kaba heh ym duna ïa ka 100 hectare.
Kat kum ka jingong jong u, la ka 100 hectare ka la biang ne em ha Meghalaya, ïa kane yn sa tip tad ynda la don ki nongtih dewiong (kiba la ïoh licence) kiba sdang ïa jingtih dewiong.
Ha u Naitung mynta u snem, ka Meghalaya State Coordination Committee of Coal Owners, Miners, Exporters, Transporters and Dealers Forum (MSCCCOETDF) kala dawa ïa ka Sorkar Jylla ban pyndam noh ïa ka Standard Operating Procedure (SOP) ba kynnoh be-aiñ, ban ai prospecting licence ne mining lease ïa u dewiong ha Jylla.
Ka SOP kala pynpaw ba ka jingai prospecting licence lane mining lease ïa u dewiong ha Jylla Meghalaya ka dei ban long tang ïa ki jaka kiba heh ym duna ïa ka 100 hectare.
Haba twad jingmut halor kane ka kam, u Ma Kyrmen ula ong “Ka mat ba kongsan eh jong ka Sorkar ka long ban kitkhia naka bynta u paidbah, ki kynhun bapher bapher, ki nongtih par bad kino kino kiba don bynta bad kiba donkam ïa ka jingkyrshan jong ngi. Ngi don hangne na ka bynta jong ki. Hynrei ïa mynta, kiba bun kila aplai ïa ka licence ha kane ka kyndon ba 100 hectare, kaba pyni ba bun ki dei kiba kot bor”.
Ha kajuh ka por, u Myntri ula pynpaw ïa ka jingsngewskhem ba ka Sorkar hapoh ka jingïalam u Myntri Rangbah u Conrad K Sangma, kan sa pynthikna shen ïa ka jingsdang noh ka jingtih dewiong kat kum ka jingstad saian ha Meghalaya.