Shillong, Naiwieng 19: U Myntri ka tnat PHE ka sorkar jylla u Marcuise N Marak ha ka sngi baar u la plie ïa ka Hamara Shauchalay, Hamara Samman ka jingïalap ban rakhe ïa ka World Toilet Day.
Haba kren sha ki lad pathai khubor, u Marak u la ong ba kane ka jingïalap ka long halor ka jingpynsngewthuh ïa ki paidbah halor ka jingdonkam ban buh ïa ki paiñkhana kiba long ki jingmyntoi ïa ki nongshong shnong khamtam ïa ki samla pule.
Na ka liang u Myntri u la ong ba watla ka Meghalaya ka la dei ka jylla kaba lait na ka leit bar shabar ne ka open defecation free state, ka sorkar ka pyrshang katba lah ban kynjoh beit ïa kane ka thong.
U la pyntip ba ka sorkar jylla ka la dep ruh ban shna bun tylli ki paiñkhana paidbah ban pyndonkam da ki nongshong shnong.
“Mynta ka sngi nga la leit sha ki 2 tylli ki jaka ban jurip hi dalade ban peit la ki dei kiba treikam ne em. Kumta nga la ïohi ba ki long kiba treikam bad ba la pyndonkam ruh da ki paidbah,” ong u Myntri ka PHE.
