Shillong, Naiwieng 19: Ka khubor ba la ïoh na ki pulit la ïathuh ba u Krishna Kr Lama u la phah ka jingujor ba ha ka 19 tarik u Nailar, 2024 ha ka por kumba 5 baje janmied kawei ka trok kaba don u nombar AS-01HC-9324 ba la niah da u Shahjamal Hoque ka la mih na M/s Goldstone Cement Ltd., kaba ha Musiang Lamare (EJH) bad kaba la kit ruh haduh 240 tylli ki byrni dewbilat na ka bynta ban pynpoi sha Changsari, Guwahati, Assam. Hynrei haduh kine ki sngi katei ka trok kam shym la poi satia sha ka jaka ba kadei ban poi bad la shem ruh ba ka mobile phone jong u nongñiah ruh ka la switched-off.
Ha kawei pat ka jingjia ki pulit ki la ïathuh ba u Dinesh Sharma u la phah ka jingujor ba ha ka 22 tarik u bnai Risaw, 2024, kawei ka trok kaba don u nombar WB-35D-7099 ka la mih na M/s Star Cement Ltd., Lumshnong (EJH) ha kaba ka la kit haduh 620 byrni ka dewbilat ban leit pynkit sha Sihtlangpui, Lawngtlai, Mizoram. Hynrei haduh mynta kane ka trok ka khlem poi satia sha ka jaka ba ka dei ban poi.
Sa kawei pat ka jingjia ki pulit ki la ïathuh ba u Bah Khrawboklang Shanpru u la phah ka jingujor ba ha ka 18 tartik mynta u bnai ha ka por kumba 12.45 baje mynstep, ki runar bym lah ban ithuh ki la tuh ïa kawei ka Remote Radio Unit (RRU) napoh ka tower kaba ha ka shnong Umjalisiaw (WJH).
