Manipur, Naiwieng 18: Katba nangmih ki sngi la nangïohi ïa ka jingjur ka jingïakynad hapoh ka jylla Manipur ha kaba ha kane ka sngi na ka liang jong ki kynhun bapher bapher na ka thaiñ Imphal Valley ka Jylla Manipur, ki la pynjur ïa ka jingïakhih pyrshah ïa ka Sorkar Pdeng, da kaba kynnoh ba kam shym la lah ban tehlakam ïa ki jingkulmar bad ki jingïa umsnam kiba dang ïai bteng haduh mynta mynne ha kaba kane ka la wanrah ruh ia ki jingjulor kiba bun.
La ong ba kine ki kynhun bapher bapher ki la sdang da ka ba khang ïa ki ophis bad ki jaka treikam jong ka Sorkar Pdeng.
Ka khubor ka ong ruh ba ha ka sngi nyngkong, ki paidbah ki la mih sha surok, da kaba pynpaw ïa ka jingbitar bad jingsngewsih jong ki.
“Ka jingshah pynïap dang shen jong ki khynnah rit bad ki kynthei ka la pynkyndit ïa ki paidbah ka Manipur. Ka paw shai ba ka Sorkar ka la pulom ban ïada ïa ki jingim briew bad ki jingdon jingem,” ong uwei na ki dkhot kiba ïakhih ha kane ka jingjia.
Ka khubor ka ong ba kane ka jingkhangdam (Lockdown) ka dei ka dak jong ka jingïakhih. Lada ka Sorkar kam leh stet ban pynbeit ïa ka jingeh, yn nang pynjur ïa ka jingïakhih.
Kum ki sienjam ban tehlakam ïa ki jingkulmar, ki bor Sorkar ki la pynjari da ka Curfew ha Imphal East bad Imphal West ban wanrah biang ïa ka shongsuk shongsaiñ.
La ong ba ka jingkulmar bad ka jingïa umsnam ka la nang jur hadien ka jinglap ïa ki hynriew tylli ki met ïap, kynthup ïa ki kynthei bad ki khynnah, ha ka thaiñ Jiribam.
Ka jinglong jingman ka la nang kham sniew hadien ba ka dur jong ka met jong kawei ka kynthei, kaba la ïoh tam na ka wah Barak, ka la saphriang ha ki social media, kaba la pynmih ia ka jingbitar kaba jur.
Hadien kine ki jingjia, la kem ïa 25 ngut ki briew na kylleng ki district Imphal East, Imphal West, bad Bishnupur namar ka jingdonkti jongki ha ka jingkhynra bad thang ding.
Ha kaba iadei bad kane la ïohi ruh ba ka la don ka jingshah thombor ïa ki ïing jong ki Myntri, ki MLA, bad ki nongïalam saiñ pyrthei hapoh ka Jylla.
Na ka liang jong ki shipai Indian Army bad Assam Rifles ki la pynjur ïa ka jingkhynra bad ha ka 17 tarik, u Lt. Gen. A. S. Pendharkar, GOC, Spear Corps, u la leit sha katei ka thaiñ ban bishar bniah ïa ka jinglong jingman ha ka liang ka jingshngaiñ bad ban ïakren bad ki shipai kiba don ha katei ka jaka.
Ka khubor ka ong ruh ba na ka liang jong ki shipai ki la pynlong ïa ka Flag March ha ki jaka ba kongsan, ba kynthup ïa ka Sanjenthong, ka jingkieng Khurai Lamlong, bad ka Thoubal, ban pynshngaiñ ïa ki nongshong shnong bad ban pynneh ïa ka jingsuk ha kane ka jylla.
