Nongstoiñ, Naiwieng 18: Ka Ophis u Assistant Registrar Co-operative Society WKHD ryngkat bad ka ophis u Sub Registrar Co-operative Society SWKHD, mynta ka sngi ka 18 tarik u Naiwieng 2024 ha ryngkat ka jingïatreilang ka Meghalaya Co-operative Apex Bank (MCAB) lem bad ka DPMU MBMA Eastern West khasi Hills District, ki la ïoh ban rakhe ïa ka 71st All India Cooperative Week Celebration halor ka phang, ‘Strengthening Cooperation Among Cooperative’, kaba dei ruh ka sien nyngkong ba la ïoh ban rakhe hapoh ka district ha ka Prokram kaba la pynlong ha Tirotsing Memorial Hall Pyndengumiong Mairang.
Ha kane ka jingrakhe ki Cooperative Society la wan ban ïadonlang ka Deputy Commissioner jong ka District ka Mitali Chandra kum ka kongsan, ka Deputy Register of Cooperative Societies zonal Office Tura ka kong A.Lyngdoh kum ka symbud kongsan.
Kiwei ki kynthup naduh u Assistant Register of Cooperative Societies West Khasi Hills District Nongstoiñ u bah K. Khongjoh, Branch Manager MCAB Mairang Branch, ki opisar na ka ophis ARCS WKHD Nongstoiñ bad na ka ophis SRCS SWKHD, Mawkyrwat, ki nongmihkhmat na ka NABARD, na ka DPMU/MBDA, EWKHD, Mairang bad kiwei de.
Ha ka jingkren kum ka kongsan na ka liang ka DC ka la ong ba kum ka Chairperson na ka bynta ban kyntiew ïa ka Cooperative, ka don ruh ka bynta ban pynïoh ïa ki jingïarap sha ki society hapoh ka district. Ka la ong ruh ba ki Cooperative kim dei kum ki Company kiba trei shimet, hynrei ki society kidei kiba don ka jingïatreilang jong baroh ki dkhot hapoh jong ka kiba trei shitom ban kyntiew ïa la ka jong ka society bad ban buh ka thong.
Katba na ka liang ka kong A. Lyngdoh ka la pynpaw ïa ka jingsngew kmen ban ïadon ryngkat lang ha kane ka jingrakhe ïa ka All India Cooperative Week kaba 71 jong une snem 2024, ha kaba ka la ong ruh ba kane ka jingrakhe ka long ban wanrah hapdeng ki Cooperative society ïa ka jingsngewthuh, lane ka jingsngewtrai ïa ki Cooperative society, kaba kum ki trai ki don ka kamram bad ka jingkitkhlieh ban trei ïa ki kam hapoh ka society.
Ka la pynpaw ruh ba ka ri India ka don ka jingthmu ban pynlong ïa ka ri kata ka ri kaba roi kaba par kaba pahuh bad kiew ha ki liang baroh bad dei lyngba ki Cooperative society kiba lah ban pynpoi sha kane ka thong. Ki Cooperative ki long ki budlum ha ka ïoh ka kot bad ban pynroi pynkiew ïa ka ïoh ka kot jong ka ri, ka la ong.
