Shillong Naiwieng 18: U Principal Secretary ka tnat Arts and Culture ka sorkar jylla u Bah Frederick Kharkongor ha ka sngi Saitjaiñ u la pyntip ba ka Sorkar jylla ka la mynjur ïa ka jingtyrwa jong ka Rabon Sing Kharsuka Memorial Committee ban kynmaw bad leh burom ïa u nongthoh bad uba la pynïar bha ïa ka ktien Khasi ha kaba kane ka pateng kaba mynta la thap ban klet noh.
U Principal Secretary ka tnat Arts and Culture u la ïathuh ïa kane ha ka prokram kynmaw burom ïa u Babu Rabon Sing Kharsuka kaba la pynlong ha ka sngi Saitjaiñ ha ka jingrakhe ïa ka lyngkhuh sngi khlad noh jong u kaba 114 snem.
Na ka liang u Bah Kharkongor u la ong ba ka Sorkar ka la don ruh ki jingthmu ban kyntiew ïa ka thoh ka tar bad khamtam eh ban pynneh pynsah ïa ka tynrai u Khasi bad ki deiriti jong u longshwa manshwa.
Ïa kane u la pyntip ba ka sorkar jylla lyngba ka tnat Arts and Culture ka la shim ïa kane ka rai hadien ba ki nongïalam jong ka memorial committee ki la wan ban tyrwa ïa ka jingdonkam ban leh burom ïa u ne u nongthoh kot ba pawnam jong ka jaitbynriew Khasi.
“Ha kane ka juk kaba mynta donkam ban pynrung ïa ki kam synniang bad ki jingim jong u Rabon Sing Kharsuka ha ki epaper ne Social media naba ki samla ha kane ka juk kaba mynta ki pyndonkam bha bad kane kan ïarap ban tip shaphang ka jingim bad ka jingnoh synniang jong u Babu Rabon Sing Kharsuka,” ong u Bah Kharkongor.
Na ka liang jong u la ong ba ka sorkar ka la sngap ïa ka jingtyrwa jong ka Rabon Sing Kharsuka Memorial Committee ïa ka jingkyrpad ban leh eiei na ka bynta ka jingkynmaw burom ïa u Babu Rabon Sing Kharsuka.
