Estádio Do Dragão, Naiwieng 16: U Cristiano Ronaldo u la pynkhihjar ar kol na bynta ka Portugal kaba la pynthikna ïa ka kynhun ban ïohrung sha ka quarter-final ha ka Nations League da kaba pynliem ïa ka Poland.
Haba ka Portugal ka la lamkhmat lypa da 4-0 kol ha ki khyndiat minit ba khatduh, u Ronaldo u la ïoh ban thep ïa ka kol kaba itynnat kaba la tip da ka ‘bicycle kick’ ban ïoh ïa ka kol kaba ar jong u ha kaba ka Portugal ka la jop da 5-1 kol ïa ka Poland.
Baroh san tylli ki kol ka Portugal ki la urlong ha ka kylla miet, kiba la thep da u Rafael Leão (59′), Cristiano Ronaldo (72′ pen bad 87′), u Bruno Fernandes (80′) u Pedro Neto (83′).
U Dominik Marczuk (88’) u la ïoh ban pyntngen ïa ka Poland lyngba ka shi kol hynrei ka jingkmen kaba khraw ka long ïa ka Portugal bad ïa ki nongkyrshan naba ka kynhun ka la pynthikna ïalade ban rung sha ka quarter final ha ka Nations League.
Kine ki ar ki kol na ka bynta u Ronaldo ki la bteng ïa ka rukom lehkai kaba seisoh jong u ha kane ka lympung, ha kaba mynta u la ïoh thep 5 kol ha ki san tylli ki jingïalehkai jong ka Nations League.
Kane ka namjop kamut ruh ba ka Portugal ka la bteng ïa ka lynti ïaid kum ka nongjop na ka Group A1, hynrei ka Poland kam shym la lah ban jam shakhmat.
