Shillong, Naiwieng 14 : U Working President ka UDP, Bah Titos W Chyne u la kob ba na baroh ki MDC kiba jop ha ka samoi 2019 dei tang ki MDC ba jop na ka UDP kiba khlem shah khring ne kyntiap noh sha kiwei pat ki seng saiñpyrthei.
Une u MDC ka Sohra ba dei ruh u Nongïalam ka Liang Pyrshah ha Iing Dorbar KHADC u la pynpaw ruh ïa ka jingsngew sarong ïa ka jingskhem nongrim jong ki MDC ka party da kaba ki ïai-neh ha ki nongrim treikam jong ka party.
“Kane kadei ka rekod mynta ka samoi, ba ym don uwei ruh u MDC ba jop na ka UDP un phet na ka party ban kyntiang seng shawei pat. Ha kiwei ki snem te ki bun ba ynda ki la jop nangi ki phet sha kiwei pat ki party. Hynrei sngewtynnad ba kine ki MDC ba mynta naduh ba ki jop ki ïai neh watla ngi don ha ka Liang Pyrshah mynta la shisnem tam,” la ïathuh shuh shuh u Bah Titos.
Katei ka jingïathuh jong u kadei halor ka jingkylli ba kumno ka Party kan bat ïa ki MDC kiba la jop na ka party namar ba ka aiñ khang kyntiap seng kam don satia ha ki District Council.
“Mynshwa, ngi la pyrshang ban pynsoi da ki kynja Soskular hynrei ngi ïoh ba kam don nongrim. Kumta, kaba ngi don ka long beit sa tang ka jingshaniah namar haba ngi la jied ïa ki ba kin long ki kyrtong bad ki nongïalam ngi kyrmen ba kin bat ïa ki kular,” ong u Bah Titos.
Ha kajuh ka por, u la pynpaw ka jingkmen ba ki don pynban kiwei ki MDC na kiwei pat ki party kiba wan ban pynïasoh sha ka party.
Une u heh ka UDP u ïathuh ruh ba ka party ka pynkhreh ruh mynta ba ïa ka thup kyrteng jong ki kyrtong kin sa lah ban pynbna noh ha ka taiew ba nyngkong jong u Nohprah, kata ha ka 6tarik u Nohprah na bynta baroh ar tylli ki Autonomous District Council ba kynthup ïa ka KHADC bad ruh ha JHADC.
