Mawkyrwat, ‘Naiwieng 11 : Kawei ka longïing kaba don ha ka shnong Mawjyrsim, South West Khasi Hills District kaba jngai kumba 28 kilometer ei ei na Mawkyrwat ka la duh noh ïa ka ïing hadien ba ka ding ba klang ka la bam duh ïa katei ïing bad ïa ki jingdon jingem.
Namarkata, katkum ki tyllong khubor ba la ïoh lum, la ïathuh ba katei ka jingjia ka la jia ha ka 10 tarik u ‘Naiwieng ha ka por kumba 10 baje ei ei mynstep bad ka longïing ka dei jong ka kong Banjalin Lyngdoh Marshillong kaba don ar ngut ki khun.
Shuh shuh katkum ka jingïathuh jong u bah Khranly Nongrem, Myntri shnong Mawjyrsim u la ong ba ka por ba pluh katei ka ïing, ka don ruh ka jingbthei jong ka Cylinder Gas bad donbok ha katei ka por ym shym don briew hajan ne ha katei ïing.
“Ïa ka daw jong ka jingpluh katei ïing haduh mynta ym pat lah ban tip bad ka jingjulor baroh la shu antad ka lah ban kot sha ka T. 1 lak tam ei ei”, ong u bah Khranly Nongrem, Myntri shnong Mawjyrsim.
