U VC u dei ban shim ka jingkitkhlieh halor ki kynrum kynram hapoh NEHU, ong ka SNBSH

Shillong, Naiwieng 10: Ka Synjuk Ki Nongsynshar Shnong Ka Bri u Hynñiewtrep (SNBSH), kaba dei ka seng jong ki nongïalam shnong napoh Khasi bad Jaiñtia Hills ha ka sngi u Blei ka la kyntu ïa u Vice Chancellor jong ka North Eastern Hill University (NEHU) ban shim ïa ka jingkitkhlieh halor kine baroh ki kynrum kynram kiba la mih hapoh ka skulbah NEHU bad ba u dei ban pyrkhat ïa ki jingdawa jong ki samla kiba ïakhih ha kine ki sngi.
Na ka liang ka Synjuk ka la kyntu ruh ïa ka sorkar jylla ban shim ïa ki sienjam kiba kongsan bad ba kam dei ban shu ieh kumto ïa kane ka jaka pule ba kan shu ïaid beit khlem don kiba shim khia.
Ha ka jingthoh na ka liang jong u general secretary jong ka Synjuk u Bah RL Blah u la ong, “Ngi kyntu ïa u Vice Chancellor ban shim ïa ka jingkitkhlieh halor kine baroh ki kam ba la jia hapoh ka skulbah NEHU bad ba u dei ban pyrkhat ïa kine ki jingdawa. U VC u lah ban don baroh ki jingthmu kiba bha ha ka pyrthei hynrei ka la long kaba la dier por bad u la duh ruh ban shong ha ka bus.”
“Kum ki nongïalam shnong ngi pynpaw ïa ka jingsngewkhia haba ïohi ïa kine ki lynti kiba la jia hapoh ka skulbah bad ki rukom treikam jong ka bad da ka jingkyrmen ba un pdiang ïa kane ka jingduna jong u bad kumjuh ruh ban sngap ïa kine ki jingdawa jong ki samla pule. Ngim kwah ban ïohi ba ki khun samla jong ngi ba kin mad ïa ki jingeh khamtam haba ki dang hap ban pyndep ïa ki jingpule jong ki sha ki kyrdan kiba shalor bad khamtam eh ha kane ka por kaba mynta ba ki don ki jingïakob ha kiba bun ki kam bad kane kan long ka jingeh ïa ki kam jong ki ha ki sngi ki ban wan,” u la ong.
Na ka liang jong u Bah Blah u la kyrpad ïa u VC ban long uba pyrkhat halor kine mat ba la buh da ki samla pule bad ban pdiang ïa ka kam long nongïalam da kaba shim bun ki jingkitkhlieh. “Kane kam dei tang ka jingkyrpad bad ka daw jong kane ka jingsngewkhia na baroh ki nongshong shnong bad na ka liang ki nongshong shnong ki la ïohi ba kine ki kam ki la kylla long kiba sniewdur halor kine ki jingjia hapoh ka skulbah ha kine ki khyndiat bnai ba la dep,” u la ong.
“Ngi kyrpad ïa ka sorkar jylla ban shim ïa ki sienjam kiba donkam bad ba kam dei ban shu ieh ïa kane ka skulbah ban pynïaid hi dalade halade. Shuh shuh ngi kyrpad ïa u Lat ka jylla Meghalaya ban shim khia ïa kane ka kam ha kaba ïadei bad ka jinglong jingman bad ban pynpaw sha ki bor badei peit jong ka sorkar pdeng ban pynbeit ïa kine ki jingeh kham kloi katba lah,” u la bynrap.
Haba phai sha ki jinglong jingman kiba la jia hapoh ka skulbah NEHU, u Bah Blah u la ong, “Ka long kaba kongsan ban kdew ba kan ym don satia ka tdem khlem ka ding ” bad la ïohi ruh ba ka NEHU ka la sdang ban hiar bha ha kine ki sngi. Lada ki jingïathuh jong ki lad pathai khubor ki dei kiba shisha ban ngeit, ka NEHU ka la hiar bha shapoh halor ka jingïoh ka kyrdan jong ka pule puthi napdeng kiwei pat ki skulbah ha baroh kawei ka ri.”
“Kumta kan long kaba bakla na ka bynta jong ngi kum ki riew paidbah ban pyrkhat ba ki rukom pynïaid kam pynïaid jam ki la pulom ban kyntiew ïa kane ka jaka pule, kaba la ktah ïa ka lawei jong ki khun samla jong ngi kiba dei ruh ka lawei jong ki ïing ki sem, ka imlang sahlang, ka jylla bad ka ri hi baroh kawei kiba shaniah tylli ha ki khun samla,” u la ong.
Na ka liang u Bah Blah u la pyntip ruh ba u la dep ban ïathuh lypa halor kine ki kynrum kynram kiba la jia hapoh ka skulbah ha ka por ba u la ai ka jingkren kum u kongsan ha ka 51st Foundation Day jong ka skulbah kaba la long ha ka 27 tarik u bnai Jymmang, 2024, wat la kane ka la pynlong ka jingsngewdiaw ïa u VC bad ki bor pynïaid jong ka ban ïohsngew ïa kine ki jingkren.
“Mynta ba kane ka kam ka la paw pyrthei bad ba la tip da ki paidbah, ka SNSBH ka ïeng ha ryngkat lang bad baroh kiba don hapoh ka skulbah NEHU, khamtam eh ki samla pule kiba ïakhih,” u la ong.