Shillong, Naiwieng 10: U Myntri Rangbah ka jylla u Conrad K Sangma mynta ka sngi, ula pynbna ba ka sorkar jylla kan ai jingiarap 20 Lak tyngka sha kiba haïing bahasem jong u Sepoy Aibok Madur u shipai jong ka 10 Batallion jong ka Assam Regiment uba la khlad noh, da kaba len lade ïa la ka jingim ban ïada ïa ka ri ha Siachen ha ka 7 tarik u Naiwieng.
U Myntri Rangbah ka jylla ula pynbna ïa katei ha ka rynsan social media ka jong u mynta ka Sngi U Blei.
Ula pynpaw ruh ïa ka jingsngewnguh bad sngewburom ïa ka jingshlur jong une u shipai uba aiti ïala ka jingim haka jingshakri ha ka kam ban ïada ïa ka ri ha Siachen.
“Ngi ai khublei bad sngewburom ïa ka jingshlur jong u Sepoy Aibok Madur ka Assam Regiment, uba la aiti ïa ka jingim haka kam jongu ha ka 7 tarik u Naiwieng, 2024, ha Siachen. U Sepoy Madur uba na ka shnong Mawbri, ha Ri Bhoi District jong ka jylla Meghalaya, ula pyni ïa ka mynsiem ieid ri kaba shisha” la ong u Myntri Rangbah.
Ula ong, “Ka jinglen lade ka jongu kan long kaei kaei kaba yn ym lah ban klet. Ngi burom ïa ka jingaiti ka jongu bad ngin ïai kynmaw ïa ka jingaiti lut jongu na ka bynta ka ri ka jong ngi”.
“Ka jingsngewlem jong ngi, ka leit sha ka iing ka sem jong u Sepoy Madur bad ngi ïeng tylli bad ki ha kaba kum kane ka khyllipmat jong ka jingsngewsih. Ka sorkar jylla ka ai ka jingkyrshan kaba pura bad ka jingsngewlem ïa katei ka longïing kaba la duh noh ïa u Sepoy Madur” la pynpaw u Conrad bad ka bynrap “Ai ba ka jingshlur bad ka jinglen lade jong u Sepoy Aibok Madur kan ai mynsiem ïa ki pateng ban wan bad bad ki matti jongu kin im junom ha ki dohnud ki jong ngi”.
