Artatien ban sei kyrtong ha baroh 29 Constituency ha KHADC-JHADC

Shillong, Naiwieng 10 : Watla ka tnad Elekshon jong ka sorkar jylla kam pat pynbna ïa ka tarik elekshon ha KHADC bad kumjuh ha JHADC hynrei na ka liang ka Hill State People’s Democrartic Party (HSPDP) ka la ïaid shakhmat ban khot ban wer ïa ki kyrtong kiba kwah ban ïakhun na ka tiket jong ka party ha kane ka elekshon kaba lah ban long shen.
Haba kren bad ki lad pathai khubor, u President ka Party, Bah KP Pangniang u la ong ba ka party ka la bthah ïa ka Central Election Committee ba kan pyntip ïa ki unit ba ki dei ban phah noh ïa ki kyrtong jong kito ki kyrtong hapoh jong une u bnai Naiwieng mynta u snem.
“Na bynta kito kito ki constituency ba ka party kam pat don unit, ki kyrtong ki lah ban phah ïa ki kyrteng beit beit sha ka Central Election Committee,” ong u President ka HSPDP.
Shuh shuh u Bah Pangnïang u la ïathuh ruh ba ha rilum Khasi (KHADC) ka party ka don kumba 12 – 13 tylli ki unit treikam katba ha rilum Jaintia (JHADC) pat ki la ïoh ban pynthymmai ha kine ki khyndiat bnai ba la dep bad mynta ki la don kumba 5-6 tylli ki unit.
Katkum ka jingïathuh jong u, na ka liang ka party kam don jingthmu ban pynieng kyrtong ha baroh 29 tylli ki constituency jong ka KHADC bad JHADC halor ka nongrim ba ka kwah ba ki kyrtong kiba ka sei ki dei ban da tip ïa ka thong treikam bad ka nongrim jong ka party haba ïadei bad ka ishu jong ka ri bad ka jaidbynriew.
Haba pynshai pat halor ka jingïatrei lang bad ka UDP hapoh ka shatri jong ka Regional Democratic Alliance, u Bah Pangniang u la ong ba ka la don ka jingpynbeit tangba kin hap ban ïa kynduh biang halor kane ka mat ruh.
Kumba long mynta, ka HSPDP kam don MDC la ka long ha KHADC lane ha JHADC hynrei ka don pat arngut ki MLA ha kaba uwei na ki MLA u bat ruh kum u Myntri ka tnad Sports jong ka sorkar jylla.