Shillong, Naiwieng 09: Kan long ka khubor kaba pynshong shit ba nalor ki kynhun tem bad kynhun rwai ha ki ri sepngi kiba la pynbna ba kin wan ïuhkjat sha ri India mynta sa kawei pat ka kynhun rwai Grammy-winning pop-rock band ka Maroon 5 kan sa wan ban rwai hapoh ri India ha kane ka sien kaba nyngkong.
Kane ka kynhun tem bad rwai kan sa kiew hapoh ka rynsan hapoh ka Mumbai iconic Mahalaxmi Race Course ha ka 3 tarik u Nohprah, 2024, ha kaba kane kan wanrah ka jingkmen ia baroh ar, kata ïa ka kynhun tem bad ïa ki riew ieid jong ka ri India. Kane ka kynhun la ong ba kan ai ki jingrwai ba pawkhmat jong ka kiba kynthup ïa ka “Sugar,” “Animals,” “Girls Like You,” bad “Memories.”
La ong ba ka kynhun rwai Maroon 5, kaba dei ka kynhun kaba la bna nam bha la khmih lynti ba kan pyni ïa ki jingrwai bad ki jingtem hapoh ka ri ha kane ka snem.
Da ka jingïaid lynti kaba la 20 snem kane ka kynhun ka la ïoh ïa ki paralok kiba bun bha kiba la buddien ïa kane ha sawdong ka pyrthei halor ka jingpaw jong ka kum ka kynhun tem bad rwai.
