Naduh u 2023 mang ka sorkar pdeng T. 7.95 klur ban pynkhuid ïa ka lyer jaboh ha Byrnihat

Shillong, Naiwieng 09: Ka pisa kumba T. 7.95 klur la dep ban pyllait naduh u snem 2019 haduh u snem 2023 da ka Ministry of Environment, Forest and Climate Change na ka bynta ka sor Byrnihat kaba dei ruh hapoh ka National Clean Air Programme (NCAP).
Ia kane la pynpaw hapoh ka affidavit ba la batai da ka Ministry of Environment, Forest and Climate Change hakhmat ka principal bench jong ka National Green Tribunal ha New Delhi dangshen.
Na ka T. 7.95 klur ba la pyllait da ka Ministry of Environment, Forest and Climate Change ha kine ki 5 snem ba la leit, ka pisa kaba la kot kumba T. 3.17 klur la dep ban pyndonkam na ka bynta kiba bun ki kam ban pynduna ia ka jingjaboh jong ka lyer hapoh Byrnihat.
Lah ban kdew hangne ba ka Byrnihat ka la long kawei napdeng ki 131 tylli ki nongbah bad ki sor ha ka ri kiba hab hapoh ka jingkhmih jong ka NCAP.
Ha ka affidavit ba la batai da ka ministry, la iathuh ba ka jylla Meghalaya ka la phah ia ka kaiphod kaba bniah halor ka jingpynbha ia ka jinglong ka lyer hapoh Byrnihat kaba la bei tyngka hapoh ka NCAP.
“Ka sor Byrnihat ka la leh bun ki kam kum ka jingshna ia ki surok, ki kam ban synreit da ka um, ka jingpynjyrngam ia ki jaka sor, ban khmih ia ka jingpynjaboh ha ki petrol pump, bad ka jingpynlong ia ki jingpynsngewthuh paidbah,” ong ka affidavit.
Katkum ka jingong jong ka Ministry of Environment, Forest and Climate Change, ka la batai bniah halor ka jingjaboh jong ka lyer ha Byrnihat kaba la pyni ba ka la don ka jingpynbha halor kane ka bynta.
Ha u snem 2017-2018 (base year), ka jingkhein halor ka jingpynleit jingmut hapoh ka PM10 ha Byrnihat ka la long 175. Ha u snem 2023-24, ka PM10 ka la hiar sha ka 104. Kumta halor kane ka la don ka jingpynbha ha ka PM10 haba iadei bad ki nongrim jong ka snem 2017-18 kaba long 41 per cent.
Lah ban ong ba ka India ka la plie ia ka NCAP ha u snem 2019 da ka jingbuh thong ban pynduna ia ka jingjaboh ka lyer da ka 20-30 per ha u snem 2024, da kaba pyndonkam ia u snem 2017 kum u snem ban pynshong nongrim.
Ia kane ka thong hadien la pynkylla noh sha ka 40 per cent ka jingpynduna ia ka jingjaboh kaba dei ban long hapoh u snem 2026, da kaba pyndonkam ia u 2019-20 kum u snem ban pynshong nongrim.
Ha u Nailur jong une u snem, ka Central Pollution Control Board (CPCB) ka la ong ba ki 21 tylli ki nongbah bad ki jaka khapsor ki la lah ban pynduna ka jingjaboh da kumba palat 40 per cent ha ka PM10. Kine ki kynthup ia ka Byrnihat, Kohima, Sivasagar, Varanasi, Dhanbad, Bareilly, Firozabad, Dehradun, Tuticorin, Nalagarh, Moradabad, Khurja, Trichy, Lucknow, Kanpur, Kadapa, Sunder Nagar, Agra, Greater Mumbai, Rishikesh bad Parwanoo.