Nongpoh, Naiwieng, 05: Ka Ri-Bhoi Youth Federation (RBYF), Shakhoikuna Unit ha ka Sngi Baar ka la mih shakhmat ban pynrem jur ïa ka jingleh bym suidñiew jong u kontraktor u pyntrei ïa ka surok naduh 20 mer shaduh Shakhoikuna kaba jngai kumba 7km eiei.
Haduh mynta ym pat i dak eiei ban sdang ïa ka kam bad kane ka la buh jingeh shikatdei ha ka leit ka wan jong ki paidbah na ki bun tylli ki shnong kiba don ha katei ka thaiñ.
U President jong ka RBYF Shakhoikuna Unit u Samla Teilang Maring u la ong ba ka seng bad ki paidbah ki dap da ka jingsngew diaw halor ka jinglong jingman jong ka surok kaba la pynsyrtok ïa ki paidbah ha ka leit ka wan khamtam ban leit sha ki iew ki hat, ki bapang bashitom tang namar ka jingkheiñ sting bad ka jingbym shimkhia jong u kontraktor.
U la ïathuh ruh ba ka surok kaba jngai kumba 7 km eiei ym pat lah satia ban shna pyndep. Kane ka la pynjynjar ïa ki paidbah hynrei naduh ba la khlong lut da ka jingthmu ban siang rong thymmai ka la wanrah pynban ka jingsohsat ïa ki paidbah ha ka leit ka wan namarba ka surok la dap sa tang da ki maw kiba la mih shabar bad buh jingeh ïa ki kali kiba ïaid lyngba katei ka surok.
Shuh shuh u kontraktor u la kular ruh ban sdang ban trei ïa ka kam naduh u bnai Risaw hynrei haduh mynta ym pat don dak eiei ban sdang ïa ka kam bad kum ki paidbah ki kwah ba ka jingsiang rong ïa ka surok dei ban sdang noh namar tang katno la poi biang ka aiom slap.
