Shillong, Naiwieng 05: Ka MP barim jong ka Tura ka Agatha K Sangma ha ka sngi baar ka la kubur ba ka jingduh noh ïa ka seat sha ka Congress ka la ktah bha ïa ka ha ka saiñ pyrthei.
Ka Agatha, kaba dei ka para jong u Myntri Rangbah ka jylla ka la shah pynrem noh ha u MLA barim ka Gambegre bad uba long u MP ka Tura mynta na ka seng Congress u Saleng A Sangma da kumba palat 1.55 lak vote.
“Ka long kaba shisha ba kane ka la ktah shibun ïa nga shimet hynrei nga la sngewthuh ba kadei ka mon jong ki paidbah bad nga la pdiang burom ïa kane bad ngi la ïoh ka jingsneng bad nga tharai ban ïaid shakhmat ki dang don bun ki kam ba dang hap ban leh. Haoid ka dei shisha ka jingshah rem kaba heh na ka bynta jong nga shimet naba kadei kaei kaei kaba long jan ha ka dohnud jong nga hynrei ka dei ruh ka bynta jong ka saiñ pyrthei. Ka jingjop ne ka jingrem phin jop khyndiat bad phin duh khyndiat,” ka la ong sha ki lad pathai khubor.
Haba kylli la kan mih biang ne em shakhmat ban iakhun ia ka elekshon, ka Agatha ka la ong, “Ngin ia peit ba ka nusip kan sa rai ia kata hynrei nga don hangne ban trei na ka bynta ki briew bad nga long shisha kaba kmen ban don ia kane ka lad.”
Haba kyntait ban kren halor ki kam jong u MP ba thymmai ka Tura, ka nongïalam ka NPP ka la ong, “Ngam don eiei ban kynthoh shaphang jong kane. Baroh kaba nga kwah ban ong ka long ba nga ai khublei ïa u Saleng ba un dang leh bha, kaba nga la dep ban leh bad nga kyrmen shisha ba un ai ka jingshakri kaba hok ha kane ka samoi treikam kumba u la leh ha ka kam MLA kaba u la dep ban bat namar ban long u dkhot jong ka parliament donkam ka jingpyrkhat kaba jylliew bad phim lah ban shu kren ïa ki jingkynthoh kiba pohdor bad shim ïa kane kum ka kam jong u dkhot ka parliament kumta ka dang don bun ka kam ba hap ban leh bad kumta nga ai khublei ïa u ba un leh bha ïa ka kam.”
