Nongstoiñ, Naiwieng 5: Ki nongïalam jong ka Meghalaya People United Front ha ka sngi hatmajai ki la leit ban ïakynduh ïa u Deputy Commssioner ka West Khasi Hills Bah Garod LSN Dykes ha kaba ïadei bad ka jingbym don ki kyrdon surok ban pynsuki ïa ki kali ha ka bynta ba ka surok bah National Highway 44 (E) bad ka surok ar laiñ na Nongstoiñ-Rambrai-Kyrshai ki ïakynduh lang ha Mawrusyiar.
Ka jingleit ïakynduh jong ki ïa u Deputy Commssioner ka dei namar ba ha katei ka jaka ki don ruh ki dukan ha baroh arliang ka surok bad na ka jingbun ki kali kiba leit ba wan ka buh ïa ki paitbah nong shong kali ha ka jingma.
U bah Kharlesborn Nongbri president ka MPUF West Khasi Hills u la ong ba ka jingleit ïakynduh ïa u DC, ka dei namar ba ha katei ka jaka ka jingïatyngkhuh kali kaju jia man ka por, na ka daw jong ka jingbym don ki speed breaker. Nangta ka seng ka la peit bniah bad ka la I donkam ban buh da ka sem kaba biang na ka bynta ba ki pulit kin ïeng ha ka por ba ki pynlong ïa ka jingtalasi ïa ki kali ha kano kano ka por.
Nalor kata u la ong ruh ba ka jingkynton khyndew jong ka Kompeni kaba pyntrei ïa ka surok Nongstoiñ-Rambrai-Kyrshai ha katei ka jaka ka lah ban wanrah ïa ka jingtyngkhuh kali lada ki dei kiba mih na shaphang sepngi bad ki kali kiba mih na shaphang Rambrai kiba thmu ban hiar sha phang sepngi namar ka dei ka jaka kaba khongdong palat.
U la ong ruh ba u la ïoh ban ïakren bad ki nongshong shnong ka Mawrusyiar, ha kaba ki la ong ba na ka liang jong ki paitbah jong katei ka shnong ruh ki la idon kam haduh katta katta ba ka sorkar kan bthah ïa ka Kompeni kaba pyntrei ïa ka surok Nongstoiñ Rambrai, ba kan pynbiang ïa ki speed breaker khnang ba ki nongleit nong wn kiba shong da ki kali kin lait na ka jingmynsaw.
Ha kajuh ka por u la ong ba ka seng kan sa leit ban ïakynduh ruh ïa ki nongpynïaid jong ka Kompeni NHIDCL kaba pyntrei ïa katei ka surok ba kin shna noh kloi ïa ki bynta kiba dang dei ban pynbiang ha katei ka jaka.
