Shillong, Naiwieng 4 : Wat hadien ba la dap 22 snem ruh ki dang bun ki MP skhim ne ki skhim kat kum ka Members of Parliament Local Area Development Scheme (MPLADS) kiba dang sahteng bad kiba ym pat lah ban pyndep haduh mynta bad kane ka la dei ka kamkai suda ong u MP ka Tura u Saleng A Sangma. ïa kane u Saleng u la lap mynta ka sngi ha ka jingïalang bishar bniah ïa ka rukom pyntreikam ïa ka MP Skhim.
Hadien ba wai ka jingïalang bishar bniah ïa ki MP skhim ba la khot da ka State Level Monitoring Committee (SLMC) mynta ka Lah Sngi U Blei, u Saleng u la ong “ Phi ngeit ne phim ngeit ba ki dang don ki kam ne ki projek jongka MP skhim kiba ym pat lah ban pyndep haduh mynta kiba la sdang naduh u snem 2002 ruh. Nga dap da ka jinglyngngoh kaba khraw balei ba hadien 20 snem ruh ki dang don ki jingtrei na ka MPLADS kiba ym lah ban pyndep nalor ka pisa ba la mang ruh kam dei kaba heh ne bun. Ngam tip shuh hangno ka jingbakla, 22 snem ka la dei ka kam kai suda nalor kata kitei ki kam kiba sahteng ki dei ruh kiba la mang hapdeng ka 50,000 hajar tyngka haduh 10 lak tyngka”.
“ Ngi la bishar bniah ïa kine ki skhim ba sahteng baroh bad u Chief Secretary u la bthah ïa baroh ki Deputy Commissioner ban shim khia bad ban pyndep ïa kine ki kam ba sahteng hapoh u bnai Nohprah mynta u snem” ong u Saleng.
U Saleng ula ïathuh ka don kawei ka projek ha kawei ka College ha Rongjeng. “ Ki la dep sei ïa ka pisa haduh 8.50 lak na ka 10 lak ba la mang hynrei haduh mynta ka kam ym pat dep satia” ïathuh u Saleng.
Haba la kylli kaei ka daw ba la pynslem ban pyndep ïa kine ki projek, u Mp u la ïathuh lehse ki MP ba mynshwa ki la ai ïa ki kam sha ki bym dei hok ban ïoh ne sha ki bym shim khia ïa ka kam ban pyntreikam ïa ki projek. “ Namar ba kane ka dei ka sien ba nyngkong ba nga shong ïa kane ka jingïalang ha ka jingshisha ka la pynkyndit ïa nga ban ïohsngew ba ki kam ba rit ba ria ruh ki dang sahteng da ki phew snem. Nga dang pyrkhat ba ka jingïalang ka long ban ïa pyrkhat ia ki skhim ba thymmai hynrei ka long pynban ban bishar bniah ïa ki skhim kiba rim kiba dang sahteng bad ym pat lah ban pyndep haduh mynta” ong u Saleng. “ Ngam kwah ban kynnoh ïano ïano ruh ïa mynta, namar ki MP kiba mynshwa ki la ai sha kiba bun kiba dei hok ban ïoh hynrei kine kiba ïoh pat kim shim khia ban pyndep ïa ki”, ong biang u Saleng.
U la ïathuh ruh ba ka MP skhim ka dei kaba rit bha ka dei tang ka skhim ka ban ïarap ïa ki jaka kiba ym ïoh ïa ki skhim na ka PWD, PHE, Education, Soil bad ter ter. Ka dei ruh tang san klur tyngka shisnem na ka bynta baroh ki district. “Hapoh ka Constituency jong nga ki don san tylli ki District bad hap ban ai lut ïa baroh hynrei wat la katta ruh ka la ïarap hi ïa ki paidbah ha kiba bun ki liang” ong u Saleng.
Ki don 37 tylli ki khim lyngba ka MPLADS 2023-24 na kine 28 tylli la dep ban pyntrei katba dang sahteng pat sa 9 tylli. Kat kum ka kaiphod ba la ai da ki DC na ka bynta kiwei ki snem ba kham shakhmat 2002 ter ter, ha North Garo Hills na ki 54 tylli ki skhim, 30 tylli la dep pyndep katba 24 tylli dang sahteng haduh mynta. Ha West Garo Hills la dep pyntrei 404 tylli ki skhim bad kiba dang sahteng ki long sa 29 tylli. Ha South West Garo Hills 37 tylli la dep pyndep katba 86 tylli ki dang sahteng. South West Khasi Hills 113 la dep pyntrei, 15 tylli kiba dang sahteng, ha West Khasi Hills baroh 7 tylli ki skhim ki dang sahteng bad dang iaid ka jingpyntrei. ha South Garo Hills 9 tylli kiba la dep 2 tylli kiba dang sahteng. Ha East Garo Hills 25 tylli kiba la dep, kawei kaba dang sahteng. Ha East Khasi Hills 515 la dep pyntrei, 29 tylli kiba dang sahteng, ha Easternm West Khasi Hills, 6 tylli kiba la dep, 10 tylli kiba dang sahteng, East Jaintia Hills 36 tylli kiba la dep, 22 tylli kiba dang sahteng, ha Ri Bhoi 20 tylli kiba la dep 17 tylli kiba dang sahteng.
