Thmu ka sorkar ban die da ki phew hajar klur ïa ka jaka hapoh ophis CTI, kynnoh ka HITO

Shillong, Naiwieng, 04: Ban pynpaw ka jingpyrshah ïa ka jingthmu jong ka Sorkar Jylla ban lilam ïa ka Conservation Training Institutes, Byrnihat ki nongïalam jong ka Hynñiewtrep Integrated Territorial Organization (HITO) ha ka lah sngi u Blei ki la leit ban pynpaw ïa ka jingpyrshah hakhmat u Director jong ka Directorate of Soil and Water Conversation ha kaba na ka liang ka seng ka la thmu ruh ban die da ki phew hajar klur ïa ka jaka kaba don hapoh ka ophis jong ka CTI.
Kane ka kynhun ba la lamkhmat da u President ka HITO Ribhoi Unit u Bah Shaniah S. Nongrum uba long ruh u Vice President jong ka HITO Seng Kmie ki la ïa kynduh ïa u Director jong ka Directorate of Soil Water & Conservation u Zenedic D. Shira ban pan jingpynshai halor kane.
Ki nongïalam ka seng ki la aiti ruh da ka dorkhas ban pynpaw ïa ka jingpyrshah kaba jur halor kane ka jingthmu ban pynkynriah noh ïa ka CTI kaba don ha Byrnihat bad ban pynkylla noh sha ka Industrial Area.
Ha ka jingïakren bad ki lad pathai khubor, u Bah Shaniah u la ong ha ka jingïakynduh ïa u Director u la pynpaw ba um don jingtip halor kane ka jingthmu ban lilam ïa kane ka jaka kaba heh haduh 72 hectare sha ka kompeni ban pynkylla sha ka Industrial Area ha ka kyrteng jong ka roi ka san.
“Ngin sa leit ïakynduh ïa u Commissioner and Secretary bad ïa u Myntri ka tnat ba dei peit ïa ka Soil and Conservation ban pan jingpynshai halor kane,” u la ong.
“Ha Ribhoi ngi la mad jingeh haduh katta katta, ba ka jingdon jong ki karkhana ka la wanrah jingeh shibun ïa ki nongshnong. Lada pynkylla sha ka Industrial Area, ka jingitynnat jong ka mei mariang kan dei kaba shah ktah. Ki sim ki doh, ki nongshong shnong bad khamtam ha kane ka juk kaba ngi im ba ka jingkharoi ki jingpang na ka tdem kaba mih na ki karkhana,” u la ong.
U la ong ba ka jingthmu jong ka Sorkar ban pynkynriah ïa ka Conservation Training Institutes, Byrnihat sha Shillong kan long ka jingduhnong ïa ka them Ribhoi.
“Ngi pyrshah jur ïa ka jingthmu jong ka Sorkar ban pynkynriah ïa ka ophis bad ka Sorkar ka thmu ban die da ki phew hajar klur ïa ka jaka ba don ka ophis Conservation Training Institutes, Byrnihat. Lada ka sorkar kam pynsangeh ngin sa shong pyrkhat ban shim da kiwei pat ki sienjam kiba kham tyngeh,” u la bynrap.
“U Director u shu ïathuh ba la bthah ïa u ban lum kyrteng ïa ki briew kiba la thung da ka MPSC bad katno ngut kiba thungkam lyngba ka DSC. Ïa ka jingthmu jong ka Sorkar ngim tip tangba ngi pyrshah ïa ka jingthmu ban aiti ïa ka jaka sha ka Kompeni,” la bynrap shuh shuh u Bah Nongrum.