Shillong, Naiwieng 04: Ki shipai BSF hadien ba ki la ïoh ka jingtip kaba thikna ha ka sngi nyngkong, ha ryngkat ka jingïatreilang bad ki pulit ki la ïoh ban kem haduh 7 ngut ki nong Bangladeshi najan khappud jong ka ri kaba ha Baldamgiri Tinali (Tri-Junction) ha thaiñ South West Garo Hills.
Kine ki nong Bangladeshi ki dei kiba la ithuh kyrteng da u Amir Ali ba la 35 snem ka rta, Mir Jahan ba la 45 snem, u Biplob Mia ba la 35 snem, Angur Hussain ba la 20 snem, Chand Mia ba la 32 snem, Rasel Mia ba la 32 snem, bad MD Bakul Mia ba la 35 snem ka rta, baroh kine ki dei ki nongshong shnong jong ka Kurigram District, Bangladesh.
Ha kawei pat ka jingjia, ki shipai BSF kiba la peitngor bha jong ka 4 Bn BSF Meghalaya ki la ïoh bat ïa 4 ngut ki nong Bangladeshi bad 3 ngut ki nong India. Ïa kine ki briew la ithuh kyrteng da Shorobindu Biswas ba la 37 snem ka rta BD, Royal Talukder ba la 17 snem, BD, Rony Lamin ba la 34 snem, BD, ka Kausalla Talukdar ba la 33 snem, BD, u Shankhor Saha ba la 46 snem ka rta uba dei u nong India, Ronbir Saha ba dang 9 snem ka rta nong India, bad Suna Lyngdoh ba la 22 snem ka rta ba dei nong India, ha ryngkat bad ka kali najan khappud ka ri kaba ha Dawki ha East Khasi Hills district.
Kine ki shipai kiba la peitngor bha jong ka 50 Bn BSF Meghalaya, ha ka jingïatreilang bad ki pulit ka jylla ki la tip ba kine ki briew ki shong riehtngen hajan Baldamgiri Tinali ha ka thaiñ khappud kaba ha South West Garo Hills District. Ha ka jingtohkit ki la pynpaw ba ki la rung sha kane ka thaiñ ban leit sha Assam ban leit wad kam bylla.
Shuh shuh ha kawei pat ka jingjia, ka kynhun jong ka 4 Bn BSF Meghalaya ki la ïoh ruh ban bat ïa 4 ngut ki nong Bangladeshi bad 3 ngut ki nong India bad ha ka jingtohkit kine ki nong Bangladeshi ki la ïathuh ba ki la rung sha India ban wad kam na jylla Assam, katba ki 3 ngut ki nong India ki la ïathuh ba ki rung sha Bangladesh ban kynduh ïa la ki jong ki baïing hasem.
