Lum jingïalang kyrkieh ka EM Market ïa ki nongkhaïi na Mawiong Regulated Market

Shillong, Naiwieng 04 : Namar ka jingud jingnam jong ki paidbah nongrep halor ka jinghiar kynsan ka dor jong u synsar, na ka liang ka Executive Member ka tnad Market jong ka Khasi Hills Autonomous District Council, Kong Grace Mary Kharpuri ka la lum kyrkieh ïa ka jingïalang bad ki nongkhaïi na ka Mawiong Regulated Market.
Ha kane ka jingïalang kaba la donlang ruh da u Deputy Secretary, Bah H Syiem, la ïakren bad ïathir sani ban lap ïa ka daw tynrai jong katei ka jinghiar kynsan ka dor ka mur jong utei u mar rep uba paw bha ha ka jylla.
Na ka liang ka Executive Member haba kren bad ki lad pathai khubor ka la ïathuh ba ki nongkhaïi na Mawiong Regulated Market ki la pyntip ba ka daw hi kadei ba ka jingpynmih ïa u synsar ka la jur bha namar mynta wat kiwei ki jylla na ka thaiñ shatei lam-mihngi jong ka ri ruh ki la pynmih lang.
“Ka jingbun palat ka jingpynmih ka ktah jur ïa ka dor ka mur. Kumta na ka liang jongngi, ngi kwah ban weng ïa kane ka jingeh jong ki nongrep bad kumta ngi la dep ban ïatai bniah bha halor kane ka mat. Ngi lap ruh ba kine ki regulated market ki duna palat bad hangne ha East Khasi Hills ngi don tang ha Mawiong te nga ïohi ba donkam ban don shuh ki regulated market kum ha Ri Bhoi bad sha West Khasi Hills. Lada ïoh ban buh kham bun kum kine ki regulated market nga ngeit kan sa weng ïa ka jingeh jong ka jinghiar dor,” ka la ong da kaba bynrap ba kin sa rah ïa kane ka mat sha ka sorkar jylla.
La ïathuh ruh ba lada don kham bun ki regulated market kan khanglad syndon ïa kito kiba wan khaïi beaiñ namar ha kitei ki iew ïa ka dor ka mur la buh ha kata ka rukom kaba long lang salonsar.
Ha kajuh ka por ka Executive Member ka ong ruh ba ka jingbym treikam shuh ka MECOFED kadei kawei pat ka jingeh kumta, na ka liang ka Council kin sa pynsngew lang sha ka sorkar kumno ban pynkhie im biang ïa kane ka tnad treikam.
“Kawei pat ka dawbah kadei ka jingwan ki nongkhaïi kiba wan na shabar jylla. Kine beit beit ki leit thied na ki trai ba rep synsar, dei hangne kein ba ka dor synsar ka hiar. Kum ha ka Regulated Market kaba don ha Mawiong kim lah shuh ban pynheh ïa ka dor namar ki la wan kito ki nongkhaïi ba shu wan thied beaiñ. Dei kane kaba pynïap ïa ka dor ka mur jong u synsar,” bynrap biang ka Executive Member.
Shuh shuh ka la ong ruh ba ïa kane ka bynta kin hap ban ïa kren sani bad rah lang sha ka sorkar jylla ban ïatrei lang na bynta ka bit ka biang jong ki nongrep.
Da kaba pyntip ba ka dor u synsar mynta ka long 52 tyngka, ka EM ka la pyntip ruh ba na ka Council lada ka lap ïa kitei ki briew kiba wan thied ïa kitei ki mar rep da ka lynti bym dei bad buh ïa ki iew ba long beaiñ kin sa leh da kaba tyngeh.