Khliehriat, Naiwieng, 03: Ha ka janmiet sngi Saitjaiñ kawei ka liew muri ha surokbah National Highway-6 ha ka dong Wahkoh, Umkiang, East Jaiñtia Hills ka la twa bad julor bha bad kane ka la wanrah jingeh ruh ïa ki kali kat haduh ba kim long shuh ban ïaid. Ka jingtwa jong ka liew muri ka la wanrah ruh ïa ka jingdheng kali kaba jur bha ha surokbah National Highway-6.
Na ka por sha ka por ki paidbah jong ka thaiñ Narpuh, East Jaiñtia Hills District ki la pynsngew sha ki bor Sorkar bad ki la pynlong ruh ki jingïakhih paidbah namar ka jingsniew shaba palat liam jong ka surok National Highway-6 bad ki jingjulor jong ki jingkieng ha ka thaiñ hynrei ka sur jingkyrpad bad ka jingud jingnam jong ki paidbah kam shym la poi shano shano ruh.
Ha kaba ïakren bad u Waheh Shnong jong ka shnong Umkiang u Bah Lasting Pala u la pynpaw ka jingsngewkhia namar ka jingbym shimkhia jong ka Sorkar bad ka National Highway Authority of India (NHAI) halor ka jingsniew shaba palat liam jong ka surok bad ki jingkieng ha ka thaiñ.
U la ong ruh ba ka rukom pyntrei ka shu long tang malu mala ha ka shnong Tongseng .
Halor ka jingtwa ka liew muri ha ka dong Wahkoh u Bah Pala u la ong, “nga ladep ong ïa ki nongtrei jong ka NHAI ba haba pyndap maw hapoh kane ka liew muri kaba twa hato ka um pat nangno kan ïaid, ki nongtrei jong ka NHAI ki ong ba kane ka jingpyndap maw ka dei kaba tang mynta shi por mynta.”
“Na ka liang jong u Deputy Commissioner u ladep ong ba ka jingpyntrei ïa ka surokbah National Highway-6 yn pyndep hapoh u bnai Nohprah. Ngin sa peit ha une u bnai Naiwieng kumno ki leh. Lada ngi pakhang surok ruh ka wanrah jingeh ïa ngi hi ki paidbah namarba kane ka dang dei ka por ba ki paidbah ki dang bun ki kam ki jingtrei jong ki kumta ngi hap ban pyrkhat ïa ki paidbah ruh kiba trei ba ktah. Tangba imat ngi hap hi ban pynlong biang da ka jingpakhang surok namar na ka liang jong ka Sorkar ruh kam shimkhia eiei ruh,” la ong shuh shuh u Bah Lasting Pala.
U Deputy Commissioner jong ka East Jaiñtia Hills District u Shivansh Awasthi u la ïathuh ba mynta ka jingsyrdep ba shipor ïa ka sorok ka dang ïaid shakhmat.
Ym lah ban len ba ka jinglong jingman jong ka surok bad ki jingkieng ha ka thaiñ Narpuh ka la buh jingma ruh ïa ka jingim briew namar katba nang ïaid ka por ka jinglong jingman jong ka surok bad ki jingkieng ka la nang kham sniew shuh shuh.
Ki paidbah jong ka thaiñ kumjuh ruh ki paidbah kiba wan na kiwei pat ki jylla ba marjan kiba ju ïaid lyngba na ka surokbah National Highway-6 ha ka thaiñ Narpuh ki ju ngat ha ka dheng kali kaba khah khah.
