Shillong, Naiwieng 01: Katba nangmih ki sngi ka lyer ban pynlong ïa ka tamasa Cherry Blossom Festival ka la beh ha kane ka snem da ka jingpynbna ïa ka jingpynkylla ne lineup change halor ki nongrwai bad ki nongtem ki ban wan pynsngewtynnad ia kane tamasa.
Ha kaba sdang la ïathuh ba ha ka 16th un rwai u Akon, hynrei ïa kane la pynkylla noh ha kaba u Akon mynta u ïeng ha rynsan ban rwai noh ha ka 15 tarik mynta u bnai bad ïa kane ka jingpynkylla la ong ba dei ka jingïapynbeit na ka daw ki sngi ba u la buh ban tour ïa ka dewbah Asia.
Halor kane ka jingpynkylla thymmai, ki nongpynïaid ïa kane ka tamasa ki la pynbna ba ka Clean Bandit, ka celebrated Grammy-winning pop group, kan shimti ha ka jinglamkhmat ha ka sngi kaba ar. Kane Clean Bandit kaba la tem ha India, la ong ba ka jingdon jong ka la khmih lynti ba kan pynshong shit ïa kane ka tamasa.
Da kine ki jingpyndap thymmai, kito kiba la don ïa ki ticket kin lah ban leit peit ïa kine ki jingpynbyrnia khlem da don shuh kano kano ka jingpynkiew ïa ka dor jong ka bai ticket. La khmih lynti ba kane ka tamasa ha une u snem kan kiew bha bad na ka liang ki nongpynïaid ki la pynpaw ka jingsngewskhem ba kane ka jingkylla kan pynsah kynmaw ïa ka jingrakhe halor ka music bad culture.
