Shillong, Naiwieng, 01: Ka Joint Action Committee (JAC) Hima Sohra ka la ujor sha ka Khasi Hills Autonomous District Council (KHADC) pyrshah ïa u Syiem jong ka Hima Sohra u Pa’iem Freeman Sing Syiem da kaba kynnoh ba u la kam trai jubor ïa ka shnong Mawspong, Hima Sohra.
Ha ka ujor ba la aiti sha u Chief Executive Member jong ka KHADC ha ka 6 tarik, Nailar, 2024, u Chairman jong ka JAC Hima Sohra u Bah Pynskhemborlang Sawian u la pynpaw ba u Bah Brawell Rynjah (Phanwanjah) u dei u khun ksiew pateng jong ka (L) Mihlah bad u dei u rangbah kur jong ka kur Rynjah (Phanwanjah). Ka kur jong u Bah Brawell Rynjah (Phanwanjah) ki dei ki trai jaka kaba don ha ka shnong Mawspong, Hima Sohra bad ïa kane ka jaka la hiar pateng bad ïoh pateng naduh ka (L) Mihlah Rynjah (Phanwanjah) bad kane ka jaka ka don kumba 1,50,00,000 sq. mitre tam ne duna.
U Chairman ka JAC u la kynnoh ruh ba u Pa’iem Freeman Sing Syiem mynba u la shah sospon naduh ka 28.08.2018 u la leh donbor da kaba u la soi beaiñ ïa ka No Objection Certificte (NoC) die jaka sha ka kong Baïadalin Rose Lyngdoh ha ka 10 tarik, Nailur, 2018 bad kynnoh shuh shuh ba u Syiem ha kane ka por ba la shah sospon u la leh donbor da kaba sei be-aiñ ïa ka pisa jong ka Hima kaba kot T. 5,00,000 lak bad ïa kane ka pisa u la sei ha lai bynta. T. 50,000 hajar u la sei ha ka 30.08.2018 na ka Meghalaya Cooperative Apex Bank Sohra Branch, T. 4,00,000 lak u la sei ha ka 31.08.2018 na ka Meghalaya Cooperative Apex Bank Sohra Branch bad T. 50,000 hajar u la sei ha ka 28.08.2018 na ka State Bank of India, Sohra Branch.
“Ïa kane ka jingsei tuh ïa ka pisa ka Hima Sohra la tip na u Public Information Officer (PIO) ha ka jubab RTI kaba u Bah Brawell Rynjah (Phanwanjah) ha ka 15.04.2019 u la pan jingtip halor ka jingleh jong u Syiem ka long kaba beaiñ,” la ïathuh u Bah Sawian.
Ha ka jingujor, u Chairman ka JAC Hima Sohra u la ong ruh ba u Syiem u la ujor da ka ejahar pyrshah ïa ki khun ki hajar ka Hima Sohra bad kane ka jingleh jong u ka la long pyrshah ïa ka hukum na ka ophis jong ka Executive Committee jong ka Khasi Hills Autonomous District Council (KHADC) kaba la pynmih ïa ka hukum ha ka 18.10.2017 ba u syiem u dei ban weng lut ïa baroh ki jingujor ejahar jong u pyrshah ïa ki khun ki hajar.
“Hynrei une u syiem um shym la bud ïa kane ka hukum kaba mih na ka KHADC,” la kynnoh u Chaiman ka JAC Hima Sohra bad bynrap, “kane ka jingbym kohnguh jong u Syiem ïa ka hukum jong ka KHADC ka dei ka jingpynkheiñ jong u ïa ki kyndon ha ka Sanad treikam jong u kum u Syiem, namar katkum ka Sanad treikam la thoh shai ba u Syiem u hap hapoh ka jingpynïaid jong ka Khasi Hills Autonomous District Council nadong shadong bad u dei ban kohnguh ïa ki hukum baroh kiba la pynmih na u Chief Executive Member ne na ki Executive Member ne na uno uno u Ophisar ïa uba la aibor na ka bynta kata.
U Bah Pynskhemborlang Sawian u la pynshisha ïa ka hok longtrai jong ka Kur Rynjah (Phawanjah) halor ka jaka ha ka shnong Mawspong lyngba ka Order dated 05.04.1940 on Misc Political Case No. 118 of 1932 ba la thoh shai ba u Keeson Syiem uba dei u Syiem Maharam u la kubur ba u dei ban siew ha ki Mawphu ba u la bam ïa ka jaka ka jong ki.
U la kdew ruh katkum ka hukum ba la pynmih ha ka 11.08.33 da u Deputy Commnissioner, Khasi and Jaiñtia Hills u K. Cantlie ha ka mukotduma Syiem of Maharam pyrshah ïa u Syiem of Cherra State.
“Kane ka pyni ba katkum ka hukum la kdew shai ba ka Mawspong kam dei ka jaka jong u Syiem ka Hima Sohra hynrei ka dei ka jaka shimet jong u Borsing uba dei u Kñi jong u (L) Ewell bad (L) Dro bad kumjuh ruh u dei u kñi tymmen jong u Bah Brawell Rynjah (Phanwanjah) bad ruh u dei na ka kur ka jait Rynjah (Phanwanjah).
Halor ka jingïapynbeit pud hapdeng ka Seng Mawphu 16 shnong bad ka Hima Maharam ha ka 10.01.1942, u Bah Sawian u la ong ba kine ki arliang mamla ki la ïahun lang katkum ka jingïapynbeit bad u Syiem ka Maharam ruh u la hun da kaba u la soi ïa ka kot jingïasuk.
“Ngi ïohi ba u Syiem Sohra um don bynta eiei halor katei ka jaka namar ba katei ka jaka kam dei ka jong u Syiem Hima Sohra hynrei ka dei ka jaka jong u (L) Ewell bad ka Shnong Mawphu,” u la ong.
Shuh shuh u la kdew ruh na ka kot jingpynskhem jong u Syiemn Maharam kaba la pynmih ha ka 11.01. 1967 kaba la thoh shai ïa ka jinghun jong u ïa ka jingïapynbeit pud hapdeng ka Seng Mawphu badei 16 shnong bad ka Hima Maharam.
“Kane ka jingmynjur hapdeng ki arliang mamla ka pyni ba ka jaka ka dei hapdengjong ki arliang mamla ym jong u Syiem Hima Sohra kumba une u Syiem ba mynta u la kam.
U la pynpaw ruh ba u Bah Brawell Rynjah (Phanwanjah) u la pynshisha ba katei ka jaka ka dei ka jong ki lyngba kane ka kot. Ha kane ka kot la kdew ruh ba ki jait Malngiang ki rep ki riang hapoh ka khyndew Mawspong kaba dei jong ka Kur Phanwanjah bad ïa kane la lah ban pynshisha ha ka Dulir Jingpynshisha kaba 25.05.,1991 ba la pynshisha da ki jait Malngiang na ka shnong Mawphu bad mynta ki la shong la sah ha Dinat bad Mawspong bad kane ka khyndew ba ki rep ki riang ka dei jong ka Kur Phanwanjah.
U la ïathuh ba u Syiem ka Hima Sohra u la khot hajir ïa u Bah Brawell Rynjah (Phanwanjah) halor ka jingleit tah maw Granite bad ka sieh Sign Board ha ka shnong Mawspong. U Bah Brawell kum u Rangbah Kur u la sieh ïa ka Sign Board bad tah ïa u maw Granite kum ka dak ka jingkynmaw ieid na bynta ka (L) Mihlah Rynjah (Phanwanjah) kaba dei ka Kmie tymmen jong ka Kur Rynjah (Phanwanjah) bad ka nongshong shnong ba nyngkong eh ha Mawspong bad haduh mynta mynne u don u Mawsyaid Sngi ka (L) Mihlah Rynjah(Phanwanjah) ha ka shnong Mawspong ha kaba ki briew ka thaiñ Mawspong bad ki marjan shnong haduh kine ki sngi ki dang tip shaphang une u sawsyaid sngi ka (L) Mihlah.
“U Syiem Hima Sohra u la leh donbor ïa u Bah Brawell Rynjah (Phanwanjah) ha kaba u khlem lah ap shuh ïa ka sngi khot hajir kaba ma u hi u la buh por ba kan long ha ka 9.04.2016, hynrei tang hadien ar sngi u syiem ka Hima Sohra u la leit ujor da ka ejahar ha Mawngap Police Outpost pyrshah ïa u Bah Brawell Rynjah.
“Kane ka pyni ba u Syiem u la leh donbor ïa ki khun ki hajar ki jong u hi khlem da burom shuh wat ïa ka hukum lajong kaba u la pynbna khot hajir ïa u Bah Brawell Rynjah bad kane ka pyni shai ruh ba u Syiem ka Hima Sohra u kwah ban knieh jubor ïa katei ka jaka jong u Bah Brawell Rynjah.
U Bah Sawian u la kynnoh ruh ba u Syiem u la pynkhein ïa ka riti ka dustur jied Rangbah Shnong hapoh ka shnong Mawspong, Hima Sohra namar katkum ka Hukum u Syiem Joinmanik Syiem (Bam kwai ha dwar u Blei) la hukumn ba baroh ki Rangbah Shnong jong ki shnong kiba hap hapoh ka Hima Sohra ki dei ban long da ki briew kiba la kha la pun ha kato hi ka shnong. Hynrei kaba lyngngoh ka long ba u Rangbah Shnong ba mynta jong ka Shnong Mawspong u Bah Swing War um dei satia u trai shnong ne uba la kha la pun ha ka shnong Mawspong hynrei u dei u nongshong shnong jong ka Shnong Umlangmar, Nongspung Syiemship bad u dei uba shu leit shongkha hapoh ka shnong Mawspong. Watla katta ruh u Syiem ka Hima Sohra u la leh donbor bad shah ïa kum une u briew uba nabar ka Hima ban long u Rangbah Shnong bad kane ka jingeh jong u ka la long pyrshah ïa katei ka hukum jong u Syiem Joinmanik Syiem (Bam kwai ha dwar u Blei).
U la pyntip ruh ba u Syiem u la ai case pyrshah ïa u Bah Kynphamlang Kharchandy uba dei u Rangbah Shnong Mawphu tang namarba u la kyrshan bad pynksan ba ka jaka ka dei jong ka Kur Rynjah (Phanwanjah) bad ruh kumjuh ïa u Bah W. Mathew Mawdkhap tang na ka bynta ba u la ai ujor sha ki pulit halor ka jingsei tuh bad sei beaiñ jong u Syiem jong ka Hima Sohra ïa ka pisa jong ka Hima Sohra ha ka por ba u dang don hapdeng ka jingshah sospon.
“Lada peit ïa kitei ki jingthoh baroh nga ïohi ba ym don satia ka kyrteng jong u Syiem Sohra ha kano kano ka kot ban pyni ba u Syiem Sohra u dei trai hynrei ka dei ka khyndew Ri Kynti jong ka Kur Phanwanjah. Hynrei kaba pynlyngngoh ïa nga ka long ba u Syiem Hima Sohra u ai kylla da ki ehajar bad ki Complaint Case ïa kino kino kiba kam ïa katei ka jaka ha Mawspong,” la bynrap u Bah Sawian.
“Na ka liang jong nga, nga kyrpad ïa phi ba phin shim khia halor kane ka bynta bad ruh ban khot hajir biang sa shisien ïa u Syiem Sohra bad ïa u Bah Brawell Rynjah (Phanwanjah) bad kiwei ki rangbah ban wanrah ïa ki kot ki sla ban pynshisha ïa ka hok longtrai ïa ka jaka kaba don ha Mawspong bad ba phin pynshitom ïa u Syiem halor ka jingleh donbor jong u ïa ki khun ki hajar jong ka Hima Sohra, “la kyrpad u Bah Sawain ïa u CEM jong ka KHADC.
