Nongstoiñ, Naiwieng 1: Ka surok na Mawlangsu shaduh Markasa ka dei kaba donkam bha, hynrei ka jingpynsahteng jong ka sorkar ban pyndep ha ka ban siang rong ïa ka bynta kaba sah tang kumba ar kilomitar ei ei, ka la pynlong ïa ki paitbah ba kin shem jingeh namar ba katei ka surok ka dei kaba dang khohruh khohram.
Ki riew rangbah haba pyntip ha u nongthoh khubor, ki la ong ba ki nongshong shnong na katei ka thaiñ naduh Mawlangsu, Lummyrsiang, Tiehdang, Mawkyrtung bad kiwei kiwei ki shnong, haba ki leit ïew leit hat sha Markasa bad ki leit donkam ha Mawthadraishan Block, bunsien ki hap ban ïaid da ka kjat ha ka jing jngai kaba hynriew haduh phra kilomitar, namar ka jingbym don ki kali kiba ïaid man ka sngi namar ka jingsniew ka surok.
Ka surok rong naduh Mawlangsu ka kut noh tang ha Mawkyrtung. Kumta ka sorkar ka la dei ban mang pisa na ka bynta ban siang pyndep noh ïa ka rong haduh lai lad, namar ba katei ka surok ka ïakynduh lang bad ka surok rong ka ban kiew sha Mawphanlur shaphang mihngi bad ka ban leit sha ka shnong Mawkohnoh kaba don shaphang sepngi .
Na ka liang ki paitbah jong kitei ki shnong, ki la kwah haduh katta katta ba ka sorkar kan siang rong noh ïa katei ka surok. Ki la kyntu jur ïa ka sorkar bad ki nongmihkhmat paidbah, ba ki dei ban phai khmat lem sha kitei ki shnong, khnang ba ki paitbah kin lait na ki jingeh.
Bunsien ki tymmen ki kro haba ki leit sei ïa ka bai bam tymmen jong ki na ka Bank kaba don ha Markasa, ki hap ban mih dang step bad ban ïaid da ka kjat bad katno ka jingisynei khamtam ïa ki tymmen kiba la palat hynriew phew snem ka karta, ba kin ïaid da ka kjat haduh Markasa ha ka jingjngai kaba hynriew kilomitar.
Ka lynti kam dei kaba suk ïa ki ban ïaid ha ka por ba ki leit bad ha ka por ba ki wan phai. Kumta lada ka sorkar ka sngew synei lem ïa ki nongshong shnong bad ki tymmen ki kro, ka la dei ban pynkloi katba lah ban siang rong noh.
