Nongpoh, Risaw 31: U President ka State NPYF, u Bah Kitbor Nongrem, u la pynpaw ba ka jingkynnoh kaba ong ba kam shym la don ka roi ka par hapoh Meghalaya ka long kaei kaei kaba bakla, namar lada ngin phai sha ki snem mynshwa bad ïa nujor bad ka jinglong jingman mynta, ngi lah ban iohi ba ka jylla ka la don shibun ki jingkylla bad ka jingkiew ha kiba bun ki liang.
U Bah Nongrem u la pynpaw ïa kine ki jingshisha ha ka jingïakren bad ki lad pathai khubor hadien ka jingpynskhem ïa u President ba thymmai jong ka NPYF Umsning Block ha Sohkyndur, da kaba u ai jingshai halor ki jingkynnoh kiba la ju paw ha ki lad pathai khubor ba kam don ka jingkiew ha ka roi ka par ha jylla.
U la ong ruh ba ka jylla ka la don ïa ka jingkyntiew sted ha ka koit ka khiah, ha kaba mynta, ha jan baroh ki district, ngi la don ïa ki Civil Hospital, ki PHC bad CHC ha ki shnong bapher bapher. Kumjuh ruh ha ka liang ka pule puthi bad ki lynti syngkien, kiba la kylla dur haka jylla.
Ha kawei pat ka bynta u Bah Nongrem u la pynpaw ruh ka jingsngewkhia halor ka jingkiew jong ki kam sniew ha kaba ïadei bad u drok. U ong ba ka jingkynnoh ïano ïano kam dei ka lynti kaba bha, hynrei ngi dei ban don ka jingïatreilang bad ka sorkar, ki dorbar shnong, ki seng bhalang bad kiwei pat ki kynhun ban ïa trei lang na ka bynta ban rat diengkhong ïa une u jingdih ba sniew bad uba lah ban pynjot ïa kiba bun ki longiing longsem.
