Nongstoiñ, Risaw 31: Ki paidbah kiba shong ba sah ha ki bynta khappud bad ka jylla Assam, ki la mad shisha ïa ka jingeh ba khraw ha ka kit ka bah, ka pang ka shitom bad ha ka ïaid ka ieng namar ka jingbym don ki surok kali ba bha ban leit sha ki shnong ki thaw jong ki.
Ïa kane la pynpaw da ki nongsynshar shnong ka thaiñ Mawïamsyiem kiba hap hapoh ka Hima Nongmynsaw, kata ba kynthup ïa ki shnong ba don ha ka thaiñ Mawïamsyiem bad kiwei. Ki la ïathuh ba bun ki mar rep kiba ki la pynmih na ki ryngkha ki risa ki la shu pyut ei noh, namar ba kim lah shuh ban kit da ka met bad pynpoi ïa ki sha ki iew ki hat bad kane ka la wanrah ïa ka jingduh nong ba khraw ïa ki nongrep.
U bah Patstar Nongshlong, sordar ka shnong Mawïamsyiem u la pynpaw ïa ka jingsngew bynñiaw, namar ba ka sorkar Meghalaya ka la iehnoh khunswet ïa ki paidbah kiba don ha kitei ki bynta khappud. U la ïathuh ba kumba long mynta ki don palat 10 tylli ki shnong kiba don ha ka thaiñ Mawïamsyiem, ki bym shym pat la ïoh pdiang satia wat tang khyndiat ruh ka jingïarap na ka sorkar jylla.
U la ong ruh ba hapoh ka shnong Mawïamsyiem, ka sorkar kam pat pyllait wat tang ïa ka khanasumari kaba la dep ban lum naduh kham mynshwa. Kane ka la ktah bad pynduhnong shisha ïa ka shnong ka thaw, namar haduh mynta kim pat shym la ïoh pdiang wat tang u khaw rashon ne kiwei kiwei ki lad jingïarap na ka sorkar.
U la ong ba katei ka thaiñ kam ïoh wat ïa ki scheme kyrpang ïa kiba duk na ka sorkar India kum ka MGNREGA, PMAY, PMGSY, bad kiwei kiwei ki kam pynroi ka ba la pynlong ïa ka thaiñ ban shong sah ha ka jingdum. Namarkata u la buh jingkylli ïa ka sorkar ba shaei ka buh ïa kita ki scheme border Road, ki scheme PMGSY bad kiwei kiwei kiba dei hok ban pynïoh sha ki jaka nongkyndong bad jaka khappud.
U la ong ba kane ka pyni ba ka sorkar jylla kumjuh ruh ki nongmihkhmat kim kheiñ briew bad kim don jingkitkhlieh ïa ki briew kiba don ha kitei ki bynta khappud. U la ïathuh ba na ka liang jong ka jylla Assam ka la pyrshang katba lah ban theh ïa ki lad jingïarap wat sha kito ki jaka ba dang hap ha u pud jong ka jylla Meghalaya bad ki la don ki nongshong shnong kiba la kham sngew jan ïa ka Assam, namar ka kham leh bha hynrei haba phai pat sha ka jylla Meghalaya ka la shu pynbam tang da u dew ryngkhiang ïa u paidbah.
Namarkata, u la kyntu jur ïa ka sorkar bad kumjuh ïa ki nongmihkhmat ba kin shimkhia ban peit lem ïa ka khia ka shon ki paidbah kiba don ha kitei ki bynta khappud, khnang ba kin ïoh ban im lem kumba long kiwei pat.
Shuh shuh, u la pynpaw ruh ba kum ki nongsynshar shnong jong ka thaiñ, ki dawa ïa ka sorkar khamtam ïa ki nongmihkhmat ba kan pynïoh noh ïa ka surok ban pynïasoh naduh Noapara-Mawïamsyiem-Umthli shaduh Kyrshai, khnang ba ki phew tylli ki shnong kiba don ha katei ka don ka thaiñ, kin ïoh noh ïa kaei kaba ki la angnud baroh shikatta na ka bynta ban kham pynsuk ïa ka kit ka bah bad ïa ka ïaid ka ïeng.
