Ban khang thied jaka ïa kiba nabar, ïakhun ka KHADC ban pynkylla ïa ka ST Order, 1950

Shillong, Risaw 30 : Ka KHADC ka la rai ban ym shong kli kti hadien ba la phriang ki khubor ba ka jingïathied ïa die jaka ha Raid Marwet ha ki shnong ba don khappud bad ka jylla Assam ka la long kaba laitlain haduh katta katta.
Haba kren bad ki lad pathai khubor hadien ka jingïakynduh ïa u Lat ka Jylla, u CH Vijayashankar, na ka liang u CEM ka KHADC, Bah Pynïaid Sing Syiem u la ong ruh ba lada peit ïa katei ka thaiñ ym i dei shuh ba kadei ka jaka Khasi namar la mih ki jingtei kiba heh kiba ym i kob shuh hynrei da la wad bniah pat ka dang dei ha u pud u sam jong ka Meghalaya kaba hap ha ka Raid Marwet.
“Ïa kane ka mat ngi la ïakren bad ka Sorkar Jylla namar katkum ka Land Transfer Act ka la khang lypa ïa ki bar jylla ban ïoh thied jaka hapoh ka jylla. Tangba kane ka aiñ kam khang pat ïa kiwei pat ki riewlum (Scheduled Tribe) na kiwei ki jylla kiba la ithuh kum ki riewlum ha kane ka jylla,” ong u CEM.
Kumta, halor kane, u la ong ba kin kyntu jur ban pynkylla thymmai noh ïa ka Constitution (Scheduled Tribe) Order, 1950 kaban kdew shai kino ki riewlum kiba dei ki riewlum trai jylla jong ka Meghalaya.
U CEM u ong ruh ba lada ym pat pynkylla ïa kane ka ST Order, 1950 yn ym pat lah ban khang ïa ki riewlum jong kiwei pat ki jylla kiba ïoh ïa ka jingithuh kum ki riewlum ha Meghalaya, ba kin thied jaka ha kane ka jylla.
Da kaba pynpaw ba ka Executive Committee ka la shimkhia bha halor katei ka jingjia, u CEM u la pyntip ba ki la khot pan jingpynshai ruh na u Syiem ka Raid Marwet, Hima Mylliem. U ïathuh ruh ba ïa kane ka bynta ki la aiti ha ka tnad Elaka bad ka tnad Land kiba la don ruh da ka komiti ban bishar bniah ïa kane ka kam.
Nalorkata, u CEM u ong ruh ba kum ka Council kan ym mab wat ban shim da kiwei ruh ki sienjam lada donkam na ka bynta ban ïada ia ka khyndew ka shyiap hapoh u pud u sam jong ka Council.