Paris, Risaw 29 : U rangïalehkai pdeng madan jong ka Spain bad jong ka Manchester City u Rodri (Rodrigo Hernández Cascante) u la ïoh ban khur ïa ka khusnam rangïalehkai ba kynsai tam ba tip kum ka Ballon d’Or ha ka jingïalang pynkup burom kaba long ha Paris, France ha ka miet sngi Nyngkong.
Katba ha ka lïang ki kynthei pat ïa kane ka khusnam la ïoh ban khur da ka Aitana Bonmatí kaba dei ruh ha kajuh ka por ka thei ïalehkai pdeng madan jong ka Barcelona.
Haba phai sha u Rodri, ka jingïoh jong u ïa katei ka khusnam kadei hadien ba u la lah ban tam ïa u Vinicius Jr jong ka Brazil bad kumjuh ïa u Jude Bellingham jong ka England kiba dei ruh ha kajuh ka por na ka klob Real Madrid.
Na bynta u Rodri katei ka khusnam kadei kaba nyngkong eh ba un ïoh khur hadien ba u la trei borbah ban ïarap ïa ka kynhun ba kan khur ïa ka nam lahduh ha ka sien kaba saw ban ban ha ka Premier League kaba long ha ka samoi ba la dep. Ha kajuh ka por u la shah jied ruh ban pdiang ïa ka khusnam Best Playeer mynta u snem ha ka European Championship hadien ba ka Spain ka la khur ïa ka nam lahduh ha katei ka lympung ha ka sien kaba saw.
Ha ka rta kaba 28 snem u Rodri uba dei na ka shnong Madrid u dei ruh u rangïalehkai pdeng ba nyngkogn eh ban khur ïa ka Ballon d’Or hadien u Lothar Mattheus ha u snem 1990 bad u nong Spain uba lai hadien u Alfredo Di Stefano ha u snem 1957 bad 1959 bud sa u Luiz Saurez ha u snem 1960 jong ka Spain hi.
Hynrei na ka liang u Coach jong ka City u Pep Guardiola u la ong, “U dei u rangïalehkai pdeng madan ba kynsai tam ha ka pyrthei kaba pynlong ïa ka klub kawei na ki kynhun ïalehkai kaba skhem tam ha England bad ïarap ruh ïa ka Spain ban synshar biang ïa ka dewbah Europe sa shisien pat.”
Na ka liang u Rodri pat u la ong ba katei ka khusnam kam dei satia na ka bynta jong u hynrei kadei na ka bynta ka phutbol ha ka ri Spain hi baroh kawei. Nangta na ka bynta ki rangïalehkai ba kynsai ba katei ka Ri ka pynmih kum u Iniesta, Xavi, Ikeer, Sergio bad kiwei kiwei.
Na bynta ka Aitana pat kane kadei ka sien kaba ar ban ban na bynta jong ka ban khur ïa katei ka khusnam kaba kordor tam ha ka lympung ïalehkai phutbol.
Ha kajuh ka por u Carlo Ancelotti u la shah jied kum u Coach ba kynsai tam jong ki shynrang katba ka Real Madrid ka la shah jied kum ka klob kaba kynsai tam jong kane ka snem.
Kiwei pat ki khusnam ba sam ha kane ka sngi ki kynthup ïa ka Kopa Trophy kaba la ïoh da u rangïalehkai ba dang khie jong ka Spain hi, u Lamine Yamal katba u Emiliano Martinez jong ka Aston Villa pat u la ïoh ban khur ïa ka Yashin Trophy.
