Ther u ma Pala ïa ka MDA bym sdang ïa ka jingtih dewïong katkum ka Saïan

Shillong, Jylliew 05 : Ka Congress ka la kynthoh tyngeh ïa ka sorkar MDA ba ïalam da ka NPP da kaba kynnoh ba kam shym la shimkhia ban pyllait noh ïa ka rukom tih dewïong da ka juk stad saïan, haduh ba mynta bun ki longïing ki la shah ktah lut bad im ha ka duk ka kyrduh khamtam eh ha ka East Jaiñtia Hills kaba don kyrhai u dewïong.
Haba kynthoh ïa kane, u President ka Meghalaya Pradesh Congress Committee, Bah Vincent H Pala u ba dei ruh u MP ka Shillong u la ong, “Ki paidbah ki la pynkhreh ban pdiang ïa katei ka rukom trei, hynrei kane ka sorkar pat ha ka jaka ban shna ïa ki aiñ , ne ai ka jingtyrwa sha Delhi ban pynkylla noh ïa ki kyndon, pynban kam shym la leh ei ei namar kim kwah ïa ka rukom tih dewïong da ka juk stad saïan, kim kwah ïa ka rukoh tih dewïong da ka lynti kaba dei hynrei ki kwah beit ba kan long da ka lynti ka bym dei namar ka pynïohnong ïa ki.”
Utei u heh Congress uba pynkhreh ruh mynta ban ïakhun na Sutnga – Saipung constituency ha ka elekshon MLA kaban sa long shen ha ka jylla u la ong ruh ba ha ka jingleit jngoh ha man ki longïing u la lap ba ka jingkyrduh kadei kaba jur bha ha ka thaiñ kaba don bun bha u dewïong.
Katkum ka jingong jong u, don ki longïing kiba ym don lad wat ban maramot ïa ki longïing ba la jot lane ban tyrwa sha ïa ki nongwan kai ha ki katto katne ki jaka. U ong ruh ba kito kiba riewspah ki la nang riewspah shuh shuh hynrei kiba nang duk ki la nang syrtok shuh shuh.
U Bah Pala u la ong ruh ba kane kadei kawei na ki dak kaba u la shim ïa ka rai ban wan phai noh sha ka sainpyrthei ha ka jylla khnang ba un lah ban ïarap ïa ki paidbah. U ong ruh ba ka jingduk kan don beit lada ka sorkar kam shim ki lad ki lynti ban kyntiew ïa ki paidbah lyngba ki polisi ban plie lad ïa ka ïoh ka kot bad ka rukom im jong ki nongshong shnong.
Haba jubab halor ka jingkylli, u la ong, “Nga kmen ban long u MP namar nga tip ban ïakhun ïa ka elekshon MP ka long kaba kham pher lada nujor bad ka elekshon MLA. Kumta nga la rai ba nga dei ban ïakhun ïa ka elekshon bad nga ruh dei ban long uba shlur ban don bad ki paidbah khamtam haba nga ïohi da la ki jong ki khmat ïa ka jingeh jongki paidbah na ka thaiñ jongnga ba ki kynduh jingeh bad kumta nga dei ban mih ban ïada bad ïakhun ïa ka jingeh ba ki kynduh.”