Shillong, Jylliew 5 : U President jongka MPCC u ma Vincent H Pala u la ong ba ka All India Trinamool Congress (AITC) kan long ka party ka ban leh sniew tam ha kane ka election MLA 2023.
“ Ka AITC kan dei ka party ka ban leh sniew tam ha kane ka election MLA 2023 namar kan ym jop palat ïaka 4-6 ngut ki MLA kumba ka paw na ki dak ki shin ba mynta” ong u ma Vincent.
U la ong tangba ki lah ruh ban jop kham bun seat lada ki pynkylla ïa ki rukom treikam jongki namar ka election kan dang long sa 8 bnai ei ei mynta. U ma Pala u la ong ba ka jingong ba ka AITC kan lehbha na Garo Hills ruh kam dei shisha namar haduh mynta ka AITC kam pat lah ban seng unit sha kylleng namar ki nongkyrshan bad nongïalam ka Congress hi ki khlem bud ïa ki MLA jongki. Kan long ka election kaba eh bha ïaka AITC bad ngam ïohi ba kin jop bun ngut ki MLA. U la ïathuh ba ki nongïalam ka Congress kin hiar biang sha ri lum Garo ha kane ka taiew ban wan.
