Kynthoh u Bah Kerlang Ksoo bym lah tehlakam ki bor district bad Pulit ha ka Public Hearing ha Wahïajer

Khliehriat, Risaw, 27: Ka public hearing kaba dang shu dep pynlong myn ha ka 18 tarik mynta u bnai risaw 2024 ha shnong Wahiajer East Jaiñtia Hills District kaba iadei bad ka jingthmu ban shna ïa ka karkhana dewbilat ba thymmai ka Meghatop Cement Pvt. Ltd, kaba la mih shibun kiei kiei kumba la paw ha ki pathai khubor bad na ka liang u muktiar u bah K.Ksoo ruh u la kynthoh jur ba ha kane ka public hearing ka paw shai ba ka dei ka jingbakla jur jong ki bor synshar district jong ka East Jaiñtia Hills District bad ki bor pulit jong ka district.
U Bah Ksoo u la ong ruh ba kam dei ka sien ba nyngkong ba kum kito ki jingjia kin mih hynrei ka wan jia shi wan jia pat ha East Jaiñtia Hills District ha kaba la pdiang ïa ka sur jong ki katto katne ngut ban ïa ka sur jong kiba bun ba lang
“Ka long shisha kaba sngewsih ban iohi ïa ka jingbym lah ban tehlakam ki bor ba dei peit kum ki bor synshar district bad ki bor pulit ki bym shym la lah ban tehlakam ïa ka shongsuk shongsaiñ (law and order) , namar ka jingpynsngew paidbah ne ka Public hearing hi ka mut kata ka rynsan jong ki paidbah ba kin ioh ban pynpaw ïa ka jingsngew jong ki, hynrei pynban, katei ka Public hearing ha shnong Wahiajer ka dei kaei kaei ka bym dei shuh kata ka jingpynsngew paidbah kaba khuid ba suba bad ka bym don shuh ka jingsngew shngaiñ ïa kiba leit ban ïa shimbynta, ïa ka sur jong ki dkhot jong ki sengbhalang kiba la don ka jingtmu ban pynsngew halor rynsan kiba don kata ka jingsngew khia ha kaba ïadei bad ka jingshah ktah ka mariang bad shah ktah ka imlang ka sahlang la shah khanglad ba kin pynsngew.
“Ka ri lum Jaiñtia ka dei kaba riewspah bha ha ka jingdon ki mar poh khyndew hynrei ïa kane ka spah la shu pynkylla long pynban kum ka jaka ïalehkai tang jong ki katto katne kiba don ha ka bor, wat ka sorkar jylla ruh na ka por sha ka por ka paw kumba kam burom shuh bad kam patiaw ei ei ïa ka mariang kaba don ha ka thaiñ bad ïa ka jingbit jingbiang jong ki briew jong ka thaiñ, hynrei ka sorkar ka phai khmat bad iohi tang ïa ka jingiohnong kaba na ki karkhana, ki mar poh khyndew ruh la shu pyndonkam khlem ka jingiohnong ki paidbah bad mynta da ka jingwan sa kane ka karkhana ba thymmai kane ka jingduhnong ki paidbah kan sa nang iai bteng bad haman la ka por ban wan ka project thymmai kaba kum kane ka wanrah ïa kajuh ka khana ne ka story, ki corporation kiba don bor, kiba don ka spah ki ioh ïa ka jingkyrshan na ka sorkar kaba la i kumba ka sorkar kam kheiñ snep shuh bad kam burom shuh ïa ka mariang bad ïa ki briew jong ka thaiñ, ki briew kiba kynduh jingeh ki dei beit hi ki juh kiba dei ki nong East Jaiñtia Hills District, ki nongrep, ki kynhun riew lum, ym tang katta wat ki jingthung jingtep kiba don ha ka mariang ruh la shu shah pynjot, pynduh”
“Ka jingkylli mynta ka mih, Hato ngin dang hap iaid shakhmat bad kine ki karkhana kiba bun? Hato mano ban siew ïa ka dor? Ka jingshisha bad ka jubab kaba mih mynta ka long ba ha ki pateng jong ki khun, ki kti bad ka lawei jong ki kin sa mad ki jingeh kiba kham khraw, kane ka jingiai bteng ban khlong ïa ka spah kan sa pynlong ia ka East Jaiñtia Hills kum ka jaka shrah ka bym long shuh ban shong ban sah katba tang khyndiat eh kin ioh ïa kata ka bainong”
“Ka long kaba la donkam kyrkieh eh ban pynkylla noh ïa ka rukom treikam ki bor district bad ki bor pulit ha East Jaiñtia Hills District, namar kane ka district ka dei ka district kaba donkam ban long phikir bha lane kaba long complex and sensitive, na kata ka daw donkam da ki heh sorkar kiba la don ka jingtbit kiba lah ban tehlakam bad kiba lah ban bat ïa kata ka iktiar kum ki khraw pyrkhat ne ki bureaucrats”
“Ki paidbah jong ka East Jaiñtia Hills ki dei ban ioh ïa kaba bha, ki donkam ban ioh ïa ka sorkar kaba sngap ïa ka sur ki paidbah, ki bor ne ki khlieh synshar district kiba don ka jingkitkhlieh ban ïada ïa ki hok ban ïada ruh ïa ka lawei, ym kata ka lawei ka ban shu long ‘lang knia na ka bynta ka jingiohnong jong ki karkhana, ka public hearing kaba dang shu dep pynlong ha Wahiajer kam dei tang ka jingbakla ha ka shongsuk shong shngaiñ, hynrei ka dei ruh ka jingbakla ha ka synshar khadar kab byn don shuh ka hoh ne kata ka justice”
“Lada ngim leh eiei mynta, kine ki spah mariang jong ka ri lum Jaiñtia kin sa duh sa dam lut baroh shi jingim namar ki dei ruh kiba bsa bam ïa ki longïing longsem jong ki paidbah ka ri lum Jaiñtia, ngi donkam ban ieng shi tylli lang kawei ka sur ban dawa ba dei ban don noh da ki nongmihkhmat bad ka sorkar kaba kaba khuid ba suba kaba lah ban ïada ka ka lawei jong ki pateng ki ban wan bad ka sorkar ruh ka dei ban sngewthuh ïa ka jingleh klet bad ka dei ruh ban sngap shwa ïa ka sur jong ki paidbah” pynkut u kyrwoh na u Bah Ksoo.