Pynjlan por biang ka sorkar sa shibnai naka bynta ka EoI ïa ka kad liengsuiñ ba thymmai

Shillong, Jylliew 5 : Ka sorkar jylla ka la rai ban pynjlan por biang sa shibnai ban ai lad ïa kito kiba thep ïaka Expression of Interest (EoI) na ka bynta ka projek kad liengsuiñ kaba thymmai ha ka jylla.
“ Ngi la rai ban pynjlan por biang sa shibnai ban ailad ïaki kynhun ne seng ban thep ïa ka EoI” ong u myntri ka tnad transport u ma Dasakhiat Lamare. ïa kane ka rai la shim hadien ba ki don ar ne lai tylli ki kynhun kiba la kyrpad ban pynjlan ïa ka por.
Hadien ba la dep thep ïaka EoI ngin sa bishar ïa ki kot ki sla bad leit peit ruh ïa ka jaka shwa ban shim ïa ka rai. Hooid kane ka dei ka kam ba kyrkieh hynrei ka sorkar kam kwah ban leh kyrkieh ïoh poi sha kaba bakla ha kaba jied biang ïa ka jaka.
Kham mynshwa ka sorkar ka la rai ban buh ïa ka 15 tarik Jymmang kum ka tarik ba khatduh na ka bynta ka EoI. Kane ka long hadien ba ka Airport Authority of India (AAI) ka la ai ïaka kaiphod sha ka ïing bishar High Court jongka jylla ba kam long kaba suk ban pynheh bad pynïar ïa ka kad liengsuiñ ha Umroi na ka bynta ban hiar ki liengsuiñ ba heh.
Namar ban pynmadan ïa ki lum sawdong katei ka kad liengsuiñ ruh kam long kaba suk satia. Kumta ka AAI ka la pynpaw ba donkam ban wad jaka noh shawei na ka bynta ka kad liengsuiñ ba thymmai kaba heh 2000 acre. Dei halor kane ba ka sorkar ka la khot EoI na ki riew paidbah bad ki la don ruh katto katne ki jaka ba la dep leit jngoh da ki briew sorkar bad kaba khatduh ka shong ha ka AAI ban rai halor ka jaka.