Ba shem jingeh halor ki lad ïoh jingsumar, aiti ka LUMPL ïa ka Ambulance sha ka DS Shella

Shillong, Risaw 16: Ha kine ki 20 snem shiteng jong ka jingtreikam ka LUMPL ha Meghalaya, ki la sdang ban leh ïa ki kam kiba ym don jingktah ïa ka sawdong sawkun haba ki tih ne khlong ïa u mawshun bad kumjuh ruh kaba long katkum ka stad saïan ha Meghalaya. Ïa ki rukom treikam jong ka LUMPL la dep ban ithuh da ka Indian Bureau of Mines (IBM), la ong ba ka LUMPL kadei tang ma ka, ka mining company ha kane ka thaiñ shatei lammihngi kaba la shah pynkup burom hapoh ka five star rating ha kine ki 6 snem ba la leit da ka IBM.
Kawei na ki kam ba trei da ka LUMPL ka long ba ka lah ban don ka jingïasuk ïasaiñ bad ki nongshong shnong. Ha kine ki 20 snem shiteng, kum shibynta na ka Corporate Social Responsibility (CSR) jong ka, ka LUMPL ka la ïarap bun ki kam ha kaba ïadei ha ka pule puthi, ka kam ai jingsumar, ka kam kyntiew ïa ki sap ki phong bad ki kam jingtei hapoh ka shnong khamtam ha ki jaka ba ka Company ka treikam. Kaba kham donkam eh ka long ba kane ka company ka ju ïasyllok bad ki nongshong shnong ne ki dkhot ka dorbar shnong ha shwa ba kin shim ïa kano kano ka prokram kaba ïadei bad ka CSR.
Ka hospital kaba jan tam kadei kaba jngai kumba 45 kilometer na ka shnong Shella, bad ka jingduna ha ki kam ban pynpoi ïa ki tiar sumar ka la long kawei na ki jingeh na ka bynta jong ki, khamtam ha ki por ba donkam ban ai ki jingsumar kiba kyrkieh. Ka jingaiti ïa ka ambulance ban pynïaid da ka Dorbar Shnong ka long kaba la ïarap bha ban pynpoi ïa ki lad jingsumar sha ki nongshong shnong.
Ïa kane ka jingaiti ïa ka kali kit nongpang ka la long ha Umpling Sports Club, Shillong, ha kaba ki riew pawkhmat kum ka Padma shri award ka kong Patricia Mukhim, Editor-in-Chief ka The Shillong Times, ka la plie ïa kane ka prokram aiti ïa ka kali kit nongpang. U Bah Tobias Tiewdop, Secretary ka Shella Village Dorbar, ha ryngkat bad ki dkhot ka Executive Committee, ki la shim bynta lang ha ryngkat ka jingdonlang u George Chacko, Director – Corporate Affairs ka LUMPL bad kiwei ki heh ophisar ka Company.
Na ka liang ka Kong Patricia Mukhim haba kren ka la ïathuh shaphang kiba bun ki kam ba la leh hapoh ka CSR jong ka LUMPL ha kaba ïadei bad ki kam shnong jong ka Shella bad Nongtrai nalor kiba bun ki jingnoh synniang sha ka SPV kiba dei hok ban ïoh ka jingïaroh. Kane ka ambulance kan ai ka jingkyrshan kaba shongdor bha sha ki nongshong shnong manla ka por kiba khamtam kiba mad ka jingeh ban ïoh ki lad jingsumar khamtam ha ki por ba donkam kyrkieh.
“Kane ka jingsdang jong ka LUMPL ka pyni ïa ka jingaiti jong ka na ka bynta ka bha ka miat jong ki shnong kiba don sawdong ki jaka treikam jong ka, kaba long ruh kaba don jingpynïasoh bad ki kam pynroi kiba ka la leh ha kane ka thaiñ,” ong u George Chacko.
Katba u Bah Tobias Tiewdop, u la pynpaw ka jingai khublei halor ki kam ba la leh da ka company, da kaba ong, “Kane ka ambulance kan ai ka jingshakri kaba khlem kut ïa ki nongshong shnong ka Shella. Mynta lah bun ki snem ba ki nongshong shnong ki la mad ki jingeh na ka daw ka jingbym biang ki kali kit nongpang bad don ka por ba na ka daw ka jingslem ban ïoh ki lad jingsumar ka wanrah ïa ki jingjia ba sngewsih. Ngi ai khublei naduh mynsiem ïa ka LUMPL halor kane ka jingnoh synniang kaba kordor ha kaba kane khlem artatien kan wanrah ka jingkylla ha ka jingim jong kiba bun.”