Shillong, Risaw 16: U Vice President ka ri India, u Jagdeep Dhankar, ha ka jingwan jngoh sha Shillong u la leit ban jngoh ïa ka IT Park ha Mawdiangdiang bad ïa u la synranlang da u Myntri Rangbah ka jylla u Conrad K Sangma.
Haba kren ha kane ka sngi u Vice President, u Jagdeep Dhankar u la ong ba ka jylla kaba la kiew ka dei ka kam kaba donkam ban dang trei shitom bad ka jingkiew ha ka GDP kam dei ka jingkdew jong ka. “Ka kyrdan jong ka jingkiew ka don ïa ki bynta bapher bapher bad kin shim ïa ka por bad ka Meghalaya hapoh ka jingïalam jong u Conrad K Sangma da ka jingdon ki 10 tylli ki Guarantee ka thmu ban pynlong ïa ka Meghalaya ka jylla kaba la kiew ha ka roi ka san.
U la bynrap da kaba ong ba katba kane ka jingthmu ban pynlong ïa ka jylla kaba la kiew, ka jylla ka donkam ban don ïa ki tyllong pynmih ïa ki lad pynroi bad ïa ka jingbiang ki kam ki ban khring sha kane ka jingpynlong ïa ka jylla kaba la kiew ha baroh ki liang.
U Vice President u la bynrap ruh da kaba ong ban kyntiew ïa ki katto katne ki jaka ka jylla ka donkam ban heh ban san hi dalade kum ha ki kam shna surok, ki kam pynïasoh bad kaba donkam ka long haba leh ïa kine ki kam jingtei hap ruh ban buh ha ki jingmut jingpyrkhat ïa katto katne ki bynta kiba ïadei bad ka roi ka san.
Na ka liang jong u ula pynpaw ruh ïa ka jingkmen ba katba ka jylla ka buh ïa ka thong ban kiew ha baroh ki liang, ka long ruh kaba kongsan ban peit ïa ki kam kum ha ka pule puthi, ka Koit ka Khiah, ka Technology, ka jingkyntiew ïa ki sap ki phong, ka kam rep ne ri jingri, ki kam ïalehkai bad ka put ka tem nalor kiwei pat.
