Shillong, Risaw 16 : Ka Myntri ka Koit ka Khiah ka Kong Ampareen Lyngdoh ha ka sngi Nyngkong ka la ong ba ka tnat shen kan sa pan ka jingai jingmut napoh ka cabinet halor ka jingpyntreikam ïa ka medical college ba nyngkong ki riew shimet, ka PA Sangma medical college and hospital of the University of Science Technology, Meghalaya (USTM).
Haba kren sha ki lad pathai khubor ka Kong Lyngdoh ka la ong, “Tat haduh ba ngin ïashong hapoh ka cabinet, la ai jingmut ïa ngi katkum ka aiñ, ha kata ka por ngin sa lah ban sdang ki kam ïasyllok halor ka USTM. Ngi don tang khyndiat ka por. Ka don ka jingdonkam kaba kyrkieh bad ngin sa pynpaw ïa u Myntri Rangbah ka jylla ban ïalam ïa ngi halor kane ka kam.”
“Kumba nga la ong, kam pat noh ka MoU ba la ïasoi. ïa ka MoU kaba lah ban ïasoi lada ïa ki jnit ki jnat jong ka MoU ngi la sngewthuh bad ba la buh ha ki jingthoh bad ba la pynbna katkum ka rukom. Kumta ngi donkam ban ap. Ngi dang pynkhreh ïa ka cabinet memo na ka tnat ka Koit ka Khiah ban buh hakhmat ka cabinet bad wad ki jingai buit na ka cabinet ha ka por kaba lyngkot katba lah,” ka la bynrap.
Haba kylli halor ka ram kaba khlem sut kaba la kot T. 200 klur ba la pan da ka USTM, ka Myntri ka la ong, “Hapoh ka cabinet memo kine baroh ki la don. Kin don ki por ba ngin sa ïamynjur, katno ka pisa, kumno ïa ka pisa ba dei ban pynphai biang, bad katno kaba yn ym pynphai shuh, kine baroh ki la don hapoh ki kot ki sla.”
Halor ki medical seat hapoh ka USTM, ka Kong Lyngdoh ka la ong, “Kumta halor kine ngi hap ban bud katto katne ki rukom treikam. Ngin ym lah ban shu peit ïa ka jingshisha ba ka private medical college ka la treikam hapoh ka jylla Meghalaya. Ki don ki rukom treikam ban thaw ïa ki committee, ban ithuh ïa ki rukom jied, kiei ki seat kiba ban leit ha baroh ka India quota, kiei ki ban leit sha ka jylla. Kaei ka bhah ne ka jingsynniang na ka bynta kine ki seat.”
