Shillong, Risaw 14 : Ka sorkar jylla ka la pan haduh 600 klur tyngka na ka sorkar pdeng na ka bynta ban pynkhlaiñ shuh shuh ïa ka jingtreikam jong ka tnad Social Welfare jong ka sorkar jylla.
Na ka liang u Myntri ka tnad Social Welfare ka sorkar jylla, Bah Paul Lyngdoh haba kren bad ki lad pathai khubor ha ka sngi Nyngkong u la ong ba ki la dep ban bishar bniah ïa ka rukom treikam bad khamtam eh haba ïadei bad ka jingkyrshan pisa ïa ka Directorate bad ruh ïa ka jingtuklar kaba donkam ban shim da ka sorkar jylla.
“Ki don ki kam kiba hap ban shim da ka Kynhun Myntri, don pat kiba hap ban rah sha ki tnad kiba dei lang bad ka tnad jongngi hangne ha ka jylla,” ong u Myntri.
Da kaba pynpaw ba donkam shuh shuh ka jingkyrshan pisa na ka sorkar pdeng, u Myntri u ong ba ki tyrwa ïa ka jingdonkam pisa shuh sa 600 klur tyngka. Katkum ka jingong jong u, kine ki kynthup naduh ka jingkyntiew ïa ka kam jong ki nongtrei kiba bun mynta kiba trei kontrak (contractual) nalor ba ka kam ruh ka khia.
Ha kajuh ka por, u Myntri ha kane ka sngi u la leit ruh ban buddien ïa ka rukom treikam jong ka women & child helpline ha ka ophis treikam jong ka Directorate of Social Welfare.
“Kumba phi ïohi ngi don ïa ki samla kiba la tbit ha ka lain technology mynta kiba lah ban trei ïa ki kam man ka sngi la ka long naduh ka jingujor kiba ïadei na bynta ki khynnah bad kumjuh na bynta ki longkmie baroh 24 kynta,” u la ong.
Da kaba ïathuh ba la phiah ïa ka rukom treikam kaba mar 8 kynta ha ka shisngi, u Myntri u ong ruh ba kine ki ïarap wat na bynta kito kiba pan jingïarap kyrkieh la ka long na ki khynnah ne ki longkmie bad wat ïa ka jaka sah, haba don kiba pan jingïarap ha ka por miet por iong.
“Ïa kine pat la hap ban leit shimti da ki nongïarap kiba dei ki kynthei hi nangta ki pulit kynthei namar ngim kwah ba ki pulit shynrang kin shimti ïa kum kitei ki jingjia,” bynrap biang u Myntri.
Ha kajuh ka por u Myntri u la pynpaw ruh ïa ka jingkmen ban ïohi ba ka jingtreikam jong ka child helpline cell ka la kot sha ka 90 persen nalor ba ki lah ruh ban lum thup ïa ki jingjia na kylleng ki distrik ha ka rynsan ban ïohi lang haduh ka ophis treikam jong u ha Secretartiat.
U ong ruh ba dei na kane ka daw ki kwah ban pynkhlaiñ shuh shuh ïa ka tnad khnang ban pyntikna ba ka jingshakri kan long kaba kham janai shuh shuh.
