Ka jingthmu jong ka Sorkar MDA-II ha Meghalaya hapoh ka jingïalam jong ka party NPP ban pynmih ïa ka kot ïarap (guide/help books) ban ïarap ïa ki khynnah pule ki ban ïaleh ïa ka Exam SSLC 2025 ïa kaba la tip kum ka ‘CM Impact, A Guide Book For SSLC Examination 2025 ‘ ka la kylla long pynban mynta kum ka rynsan jong ka kam saiñ hima sima (political issues) jong kane ka sorkar MDA-II. Ym tang katta, ka party liang pyrshah, ka VPP ka la kynther tyngeh ïa kane ka rukom ïalap politic barieh (hiden political agendas) jong ka party NPP.
Ki don bun bah ki mat ba ki paidbah ki dei ban tip, ban shai bha bad ki dei ruh ban da peitmat syndon bha kdar ïa ki buit sianti jong kane ka sorkar MDA-II hapoh ka jinglamkhmat jong ka party NPP namar la plan ïa ka da kita ki riewstad, ki ‘riewshemphang ba tbit bha kiba la thung khnang ka Sorkar (consultants) khnang ba ki riew paidbah kin ym tip ne sngewthuh eh hynrei kin shu ngop beit bad ngat lydui-lydui ha ka jingriam (political trap) ba stad jong ki.
Kane ka la dei ruh kajuh ka plan ba ki la leh ha ka Sorkar Pdeng (central govt.) jong ka NDA ha Delhi. Ka sorkar NDA ha Delhi ka la leh ïa baroh ki scheme,ki kam pynroi bad kam leh bha ïa ki paidbah ha ka kyrteng Prime Minister lut. Hangne ruh ki la sdang leh hi kumjuh da kaba ai kyrteng lut Chief Minister. Hynrei hangne pat, ka symbol jong ka party NPP ka dei ka Kot (book) bad la plan lypa ruh ba ki khynnah pule SSLC 2025 kin sa dap 18 snem ha u snem 2028, kumta, kin sa ïathep ruh ïa ki vote jong ki ha ka dur jong ka Kot jong ka party NPP ha ka Elekshon jong u snem 2028. Ka kot Guide Book kaba donlang ka dur u Chief Minister ha kane ka Guide Book ka lam lynti imat shata.
Hynrei, ka rukom sam pat ïa kine ki Guide Book sha ki nonghikai jong ki skul kim long satia kiba ryntih (not uniform and unfair. Kito ki skul kiba pynlong kum ki centre jong ka Pvt SSLC Selection Test ki ïoh ïa kane ka Guide Book katba kito pat ki bym dei Centre Pvt Selection Test kim ïoh satia, la shu phah peit hi na ka Website jong ka MBOSE. Kane ka mut ba ka Sorkar ka sam ïa kine ki Guide Book tang kumba shi powa na ki skul kiba don ha ka jylla katba lai powa pat kim ïoh Guide Book satia.
Lada ka Sorkar kam lah ban sam lut sha baroh ki skul, kaba kum kata ka long ka sorkar kaba leh shiliang khmat.
Kawei pat kaba kham shyrkhei bad kham ima ka long, ba kane ka sorkar MDA-II ka la sdang ban mushlia (political interferences) ïa ki bor pynïaid Exam jong ka MBOSE kaba long ka bor pynïaid Exam ba laitluid (autonomous body) naduh ki por mynshwa. Hynrei mynta pat, imat ka MBOSE ka la kylla long pynban tang kum ka Niangkohnguh (political agency) jong ka sorkar.
Lada ka long ha kane ka rukom, kan don ka jingma kaba shyrkhei bha ïa ki khynnah kiba ïaleh SSLC/HSSLC Exam hadien habud.
Lada shah mushlia ha ka Sorkar (political interference), kan sa poi ka por ba kito ki khynnah kiba ïajan ne ithuh ïa ki poticians kin pas bha beit ïa ka Exam SSLC/HSSLC katba kito pat ki bym ïadei ne ïajan bad ki politician kin shu pheil ei kha-ma-kha wat lada ki leh bha ha ki eksam jong ki kumba long ka Exam applai (apply) kam Sorkar ha kine ki por.
Hynrei kaba kham ma bad kham shyrkhei shuh shuh kalong ba ïoh mih sa ka pyndam sia lieh (white ink) ha ki mark jong ki khynnah SSLC/HSSLC lada ailad ïa ki politician ban korbar ne tuklar ïa ka kam Exam.
Lada u/ka khynnah ka ïoh tang 08, ki bor bahalor kin sa phah pyndam sia lieh noh ban pynlong ïa ka 08 mark sha ka 80 mark kumba jia ïa ka kam thung nonghikai skul ha kito ki snem kiba ladep. Ki paidbah ki dei ban husiar bha ïoh ka jia shisha kane ka apot namar ba ym myntoi shuh ban ïa babe hadien habud.
