Shillong, Risaw 14: Ka Khasi Students’ Union (KSU) ha ka sngi Nyngkong ka la dawa ba dei ban pyndam noh ïa ki jingpynbna na ka kam nonghikai guitar hapoh ka tnat Arts & Culture bad ka kam hapoh ka Directorate of Forensic Science halor ka jingkynnoh ba ka don ka jingleh bakla bad jingbym beit ki rukom pynïaid kam.
Ha kajuh ka por ka union ka la dawa ruh ïa ka jingpynshai halor ka rai jong ka sorkar jylla ban kyntiew kyrdan ïa ki 6 ngut ki nongtrei sha ka kyrdan Meghalaya Civil Service (MCS).
Ha ka shithi ba la aiti sha u secretary incharge Personnel & AR department u Bah Cyril Diengdoh, u chairman jong ka KSU employment monitoring cell u Bah Reuben Najiar u la ong, “Ngi kyrpad da kaba sngewrit ïaphi ban shim khia kloi ïa ka kam halor kane ka jingdawa. Ka Union ka dawa ba ka advertisement na ka bynta ka kam hikai guitar bad ki kam hapoh ka Directorate of Forensic Science dei ban pyndam noh bad ban pynshisha mardor khnang ban ai lad ïa ki kyrtong kiba la tbit ban apply bad kumjuh ban pynshai ïa kine ki jingsngewkhia ba la pynpaw da ka Union kaba ïadei bad ka jingkyntiew kyrdan ïa ki nongtrei sha ka kam MCS.”
U Bah Najiar u la ong ba ka post ‘Guitar Instructor’ la pynmih jingpynbna ha ka 19 tarik u Nailur, 2024 hapoh ka State Institute of Arts & Culture. Halor kane ka jingpynbna ka don tang kawei ka post kaba la pynbna na ka bynta ka kam hikai guitar ne Guitar Instructor bad ïa kane ka kam la ai sha ka Garo category.
“Ka jingdon baroh ki kam Guitar Instructor hapoh ka State Institute of Arts & Culture ka dei 2 tylli bad 1 na ka bynta kane ka kam ba mynta kaba la buh na ka bynta u kyrtong na Garo. Kumta ïa kane ka kam ba la pynbna ka dei ban leit sha ka Khasi-Jaiñtia khamtam hadien ba kane ka kam ka la thylli hadien ka jingshongthait jong u nongtrei uba dei u Khasi, hynrei kumba ka long mynta kane kam long satia kumtei,” u la ong.
Shuh shuh ka seng ka la ong, “Ka Union kam don kano kano ka jingisih pyrshah ïa ki bad ka kitbok ïa ki kam jong ki kiba hadien habud, hynrei ka Union ka kwah ban kylli ïa ka tnat Personnel & A.R ba balei ki kwah ban kyntiew kyrdan ïa kino kino kiba don ha kiwei ki kam ban kyntiew noh ïa ki hapoh ka Civil service. Lada ïa kino kino ki briew lah ban kyntiew sha ka kyrdan MCS, ka mut ba ym donkam shuh ban pynlong ïa ka MCS examination. Ka Union ka dawa na ka tnat Personnel & A.R ban pynshai halor ka jingjied ïa kitei ki kyrtong, ka nongrim bad ki jingnoh synniang ba ki la leh ba kin shah jied ban shah kyntiew kyrdan sha ka kam MCS.”
