Nongstoiñ, Risaw 13: Ar ngut ki rangbah ki bym tip kyrteng satia ki la mynsaw jur bha na ka jingleit ryngkoh jong ka maruti Alto K 10 hapoh ka thliew muri kaba heh bha kaba dap da ka um. Katei ka jingjia ka la jia mynta ka janmiet sngi u Blei ha ka por kumba lai baje ei ei ha Mawbroi kaba jngai kumba shiphew kilomitar na Nongstoiñ shuwa ban poi ha Pamphyrnai lake.
Katei ka jaka ka dei hamar ba poi ka khongdong surok kaba khlad na ka National Highway Shillong Tura, ha kaba ki briew kiba ïabeh sha katei ka jaka bad la lap pynban ba ki nongshong shnong kiba don ha katei ka jaka ki dang shu dep sei ïa ki ar ngut ki briew na kawei ka Maruti Alto K10 kaba don ïa u Registartion Number ML.05 AC 3696 kaba la thiah lyndang hapoh ka muri kaba dap um.
Ki nongshong shnong kiba don ha katei ka jaka kiba ïohi ïa katei ka jingjia, ki la ong ba imat u nongñiah u la buaid kyiad bad pynher sted palat ïa ka kali. Namar la shu lap ïohi tang liak ba ka leit rynsied sha phang ka sañium ba don ka muri bad haba ki la leit peit ki la pyrta ïa ki para mar jan bad ki la wan bad ïarap ban sei ïa kitei ki briew.
Tang shiphang la wan mih kawei ka maruti bad ka la pynkit noh wut wut ïa kitei ki briew ha kaba ym shym lap ba kylli la ki thmu ban kit sha Hospital ne sha ïing ruh ym tip satia. Haduh ba thoh ïa kane ka khubor ym pat lah ban pynthikna ba kitei kiba mynsaw ki dei na kano ka shnong bad ka kali kaba kit ïa ki shano kan leit buh.
