Guwahati, Risaw 12: Kumba san ngut ki koidi kiba dang don hapdeng ka jingshah bishar hapoh ka kyndon POCSO, ki la phet tuh na phatok Morigaon District Assam hapdeng ka por 1 haduh 2 baje mynstep.
Ka khubor na ki pulit katei ka jylla ki la ïathuh ba halor kane ka jingjia, ka Sorkar Assam ka la thung da ka jingtohkit Magistrate.
Hadien kane ka jingjia, ka Sorkar ka la wengkam shipor ïa u nongap phatok u Prashanta Saikia bad la thung 2 ngut ki nongap phatok na Guwahati ban khmih ïa ka Morigaon District Jail.
U Inspector General (Prisons) u Pubali Gohain un pynlong ruh ïa ka jingtohkit ba kyrpang jong ka tnad halor kane ka jingjia.
Ki pulit ki la ïathuh ba kine ki koidi kiba la lait phet, ki dei kiba la tip kyrteng kum u Saifuddin, u Ziarul Islam, u Nur Islam, u Mafidul, bad u Abdul Rashid bad ki la phet da kaba pynpait ïa ki nar grill jong ka Jail bad ki la phet da kaba pyndonkam da ki jaiñ thiah ban kiew ïa ka kynroh kaba 20 phut.
Katkum ka jingïathuh jong u Morigaon District Commissioner u Devashis Sarma, u la ïathuh ba kitei ki koidi kiba wanrah na ki thanat pulit ha Tezpur ha Sonitpur district, Lahorighat, bad na Moirabari ha Morigaon district.
U Superintendent of Police ka Morigaon u Hemanta Kumar Das u la pyntip ba ka jingthwet ka la ïaid shaid shaid mynta ban lapdien ïa kine ki 5 ngut ki koidi kiba la lait phet.
“Ngin sa tohkit ïa ki katto katne ki koidi phatok kiba donkti ha kane ka kam. Baroh kan mih ha ka jingtohkit,” la ong u Das bad bynrap ba ki pulit ki pynjur ïa ka jingpyrshang ban kem ïa kiba la phet.
