Palat 347 tylli ki iing kiba la pra phom ba lyngshop ka mariang ha rilum Garo

Shillong, Risaw 09 : Ki la don palat 347 tylli ki iing kiba la pra phom ha ki 246 tylli ki shnong jong ka rilum Garo na ka jingwan lyngshop ki bor ka mariang ha kine ki khyndiat sngi kiba la dep.
Katkum ka jingïathuh da u Myntri ka tnad Revenue and Disaster Management ka sorkar Jylla, Bah Kyrmen Shylla la ong ruh ba ha kane ka kynti ba mynta ki la don haduh 15 ngut kiba khlad tang na ka daw ka bor mariang bad 6 ngut kiwei pat ki la mynsaw.
“Kadei ka jingjia kaba shyrkhei kaba nga sakhi kum u Myntri kane ka tnad ba ka rilum kan mad ïa kum kine ki jingjia shah lyngshop mariang kaban shim haduh 15 ngut ki jingim briew,” u la ong haba kren bad ki lad pathai khubor.
U Myntri u la pynpaw ruh ïa ka jingsngewnguh ïa u Myntri Rangbah ka Jylla, Conrad K Sangma ryngkat ki ophisar kumjuh ki nongmihkhmat ha kito ki thaiñ kiba la leit ban jngoh hi dalade ïa ka jinglong jingman ha kito ki jaka ba jur ka jingshah lyngshop mariang bad ruh ban kynduh ïa ki lanot kiba la duh noh ïa ki baieid ba thoiñ.
La ïathuh ruh ba u Myntri Rangbah da lade u la leit ban aiti ïa ki song jingïarap pisa sha ki bahaiing jong kito ki longiing kiba duh noh ïa ki khun, ki hynmen para bad kurim ha katei ka jingjïa ba sngewsih.
Katkum ka jingïathuh jong u ha West Garo Hills ki don haduh 132 tylli ki shnong kiba shah ktah, 93 tylli ki iing kiba julor bad san ngut ki briew ki la duh ïa la ka jingim.
Katba ha South Garo Hills pat ki don haduh 79 tylli ki shnong kiba shha ktah, 244 tylli ki iing kiba julor bad 7 ngut kiba khlad. Katba ha East Garo Hills pat ki don 12 tylli ki shnong kiba shah ktah, kawei ka iing kaba julor bad lai ngut kiba khlad nalor ki lai ngut kiba mynsaw.
Ha North Garo Hills lai tylli ki shnong kiba shah ktah, katba ha South West Garo Hills pat ki don kumba 15 tylli ki shnong kiba shah ktah nalor ki phra tylli ki iing kiba shah pynjulor.
U Myntri u ïathuh ruh ba saw tylli ki shnong ki la shah ktah ha Eastern West Khasi Hills katba ha East Khasi Hills pat kawei ka shnong ka la shah ktah bad kawei ka iing ka la shah pynjulor ha ki bor ka mariang.
Shuh shuh la pyntip ruh ba ki don haduh 69 tylli ki ktem sah shipor lane ki relief camp, kata kawei ha Chokpot kaba ha South Garo Hills bad 68 tylli pat ha Dalu kaba ha West Garo Hills. U la ong ruh ba ki don haduh kumba 6.51 lak ngut ki nongshong shnong kiba shah ktah ha kane ka jingwan lyngshop ki bor ka mariang.
U Myntri u la kubur ruh ba ka jingshah pynjulor ki iing ki sem ka la long shaba palat pud nalor ki lynti syngkien, ki jingthung jingtep bad ki jingri kiba la ngat lang ha kane ka lanot mynta u snem.