Shillong, Risaw, 08: Ka jingïakhih ba khlem pud sngi jong ki nonghikai skul SSA kiba don hapoh ka shatri jong ka All Meghalaya SSA School Teachers Association (AMSSASTA) ka la kynjoh mynta sha ka sngi kaba phra hynrei haduh mynta ki nongïalam jong ka seng ki la pynpaw ïa ka jingsngewkhia halor ka jingbym khot ïakren jong ki bor ba dei peit jong ka tnat Pule Puthi ka Sorkar Jylla ban ïathir ïatai ïa ki mat jingdawa jong ki.
Kum ban shu pyntip hangne, kane ka kynhun jong ki nonghikai skul SSA ki la sdang ïa kane ka jingïakhih kaba khlem pud sngi ha Madan Malki, Shillong naduh ka 1 tarik mynta u bnai hadien ba ka jingaipor ïa ka Sorkar Jylla ka la kut noh ha ka 30 tarik Nailur, 2024.
Ha ka jingïakren bad ki lad pathai khubor u General Secretary jong ka seng u Bah Wanpyndaphi Lapang u la ïathuh ba lada ka Sorkar Jylla ka dang ïai mynthi halor kane ka jingdawa, kum ka seng kan sa shim shuh shuh sa da kiwei pat ki sienjam kiba kham tyngeh ha kine ki sngi ki ban sa wan.
La sakhi ruh ba ki nongïalam jong ki nonghikai skul SSA na rilum Garo ki la wan ai jingkyrshan lang ïa ki nonghikai kiba sah miet ha madan Malki.
Ka AMSSASTA ha ka Lah Sngi u Blei mynta ka taiew ka la phah da ka jingthoh sha u Myntri Rangbahduh ka ri u Narendra Modi ba un tuklar lem halor ka jingpynkiew tulop ïa ki 13,000 ngut ki nonghikai skul SSA hapoh kane ka jylla Meghalaaya.
“Naduh ka por ki sorkar barim, ki la pynkiew ïa ka tulop kaba shispah percent hynrei dei tang kane ka Sorkar ba mynta wat hadien phra snem ruh kam shym la pynkiew satia ïa ka tulop kaba ngi dei ban ïoh,” ong u Bah Wanpyndaphi Lapang haba ïakren bad ki lad pathai khubor.
“Ka jingdawa, ka long namarba ki nonghikai skul SSA ha ki Lower Primary ki ïoh tulop tang T.19 hajar shi bnai bad ha ki Upper Primary ki ïoh tulop tang T.20 hajar tam shi bnai hynrei namar ka jingkiew dor jong ki marbam mardih ngim sngew donlad shuh ban shu im tang ïa kane ka jingïoh tulop,” u la ong.
Ka AMSSSASTA ka la pyntip ba ka jingpynkiew tulop khaduh eh ka long ha ki snem 2016-17. Ka tulop jong ki nonghikai SSA ha ki Lower Primary ka long naduh T. 9200 hajar haduh T. 19044 hajar shi bnai katba ka tulop jong ki nonghikai ha ki Upper Primary ka long T. 9,900 hajar haduh T. 20,493 hajar shi bnai.
