Kane ka juk mynta ka dei kaba baroh kim lah ban im khlem ka bording elektrik bad ngi sngewthuh bha haba ong ka BOR ka mut dei da ka ba ki briew ki lah ban leh ïa ki kam ki dup baroh jong ki. Ha kine ki sngi jan baroh ki ki jingtrei jingktah ki donkam ïa ka bording elektrik, wat haduh ki phone ne ki mobile ruh ki hap ban pyndap bor na ka elektrik hi. Katno tam lei kiwei kiwei pat ki jingtreikam naduh ki kor ki bor komputor, ki jingtei jingshna jong ki riew paidbah bad kumjuh ruh wat ki karkhana rit jong kito kima im ha kaba trei ïa ki kam la jong, haduh ki kam shimet kim lah ban kamai ne trei dep khlem ka bording elektrik. Ka long kaei kaei kaba sngewsynei ban ïohsngew ïa ka jingud jong ki paidbah ka thaiñ Ri Bhoi ym tang ka Nongpoh kaba dei ka Headquarter jong ka District, hynrei jan baroh kawei ka Ri Bhoi hi ki paidbah ki la ud halor ka jingkhlaiñ palat jong ka jingpynlip ïa ka bording elektrik bad bunsien ka jingmeh ruh ka long thik kumba suh jyndong tang ha i por ba khyndiat ruh ym lah ñiew shuh haduh katno sien la pynlip ïa ka bording. Uwei u riew rangbah u la ong ba lada dei ba ïakop pynlip bording te ka Nongpoh ka la dei ban ïoh Award ne Khusnam syndon hi !
Na ka por sha ka por na ka liang jong ki paidbah nongshnong shnong jong ka Ri Bhoi District ki la ïai pynpaw ïa kane ka jingkynduh jingduh jong ki, hynrei haduh mynta na ka liang jong ki bor sorkar kim pat shym la lah satia ban peit bad pynbha ïa kane ka kam. Ki don kiba ong ba kat ka jingjur slap jong ki thain Sohra, Pynursla bad Mawsynram ruh hynrei ka jinglip bording pat ka dang palat eh hi ha ki thain jong ka Nongpoh. Ki la don bun kiba kynnoh bad imat ïa ka bhah bording jong ka thaiñ Nongpoh, Ri Bhoi District la ailad beit ban pyndonkam sha ki Karkhana kiba don ha ki Industrial Estate ka thaiñ Byrnihat bad pynduh noh ïa ka jingdonkam jong ki paidbah pat. Ym lah ban tip haduh katno kata ka lah ban long kaba shisha ?
Hynrei ka long kaba shisha ba ki don ki bor ba ka jingai bording ha ka thaiñ Nongpoh bad kiwei pat ki bynta jong ka Ri Bhoi District ka long thik tang kumba haba por ba ki Karkhana heh kim pyndonkam la ai sha ki paidbah. Ka don ka por ba ka light ka meh tang kumba 1 minit ne 2 minit bad ka la lip biang bad kumta shi kumta. Ka long lehse kum ha ka por haba don ba welding ka lip light bad da don ba ieh ka meh light. Don ka por ba ka light ka lip naduh ka por 8 ne 9 baje mynmiet bad meh pat haduh ka por 6 baje janmiet ka sngi kaba bud ! Ka long shisha kaba eh ban pyrkhat da ka bor jong ki riew paidbah. Hynrei ka don ka jingsubar kaba jur ba ka la don ka jingleh klep ne die tuh ïa ka bording jong ki paidbah sha kitei ki karkhana !
Kane ka jingjia kam dei kaba jia tang mynta u bnai ne mynta u snem, hynrei la bun snem ka la ïailong kumne shi kumne. Uwei u rangbah u la ong ba haba la pyrshang ban wad jingtip naduh katei ka por la aidaw ba ka dei na ka daw jong ka jingduh jong ki tiar bording, hynrei kumno ka lah ban shu long ba kan duh sah haduh mynta. Kumjuh ruh kumno kan don haba ka long ban pynmeh bad pynlip biang bad haba ki mon pat ka meh beit khlem ka jingthut hi.
Kaba kham eh ban sngewthuh ka long ba kumno kat ka Nongpoh kaba dei ka Headquarter jong ka Ri Bhoi District, ha kaba ki don lut ki ophis jong ki tnad sorkar naduh ka office kum ka D.C office, S.P office bad bun bah kiwei pat. Hynrei la ong ba haba lip light kine baroh ki ïalip light lang wat la ki don makna ki jingkyrshan ne backup ba biang hynrei kim lah shah hi haba lip light baroh shi sngi. Kumta kane ka jinglip light ka ktah ym tang ïa ki paidbah hynrei wat ïa ki tnad sorkar ruh kumjuh hi. Katba ym shym la lah ban leh ei ei kat haduh mynta.
Kumba ka Ri Bhoi District ka dei kawei na ki District kaba dang kiew shaphrang ki don ruh shibun ki jingïatei ïa shna bad ki don ruh kiba wanrah nongtrei ban trei ïa ki kam kiba kham kyrpang da ki briew kiba namar namar ka jingbymlah ban trei hi da ki briew la jong. Kumta kane ka wanrah jingeh shibun haba kim lah ban trei beit ïa ka kam, hynrei ki hap ban shu ïai iehteng da ki bun bun sngi. Kumta na ka liang jong ki paidbah jong ka dong Ri Bhoi ki sngew ban kyrpad jur ïa ki bor ba dei peit ba kin sngewbha ban leh ei ei lem ban pynïoh lem ïa ka bording kaba biang khnang ba kin lah ban pyndep ïa ki kam ki dup ha ka por kaba biang bad lait na ki jingeh kiba bun.
