Da ka jingïasynñiang pisa ïarap ka ophis PHE ïa ka kong Kmoiñ Wahlang

Mawkyrwat, Risaw 04: U Executive Engineer jong ka PHE Mawkyrwat Division ha ryngkat ki nongtrei ophis da ka mynsiem jong ka jingieit ryngkat ka jingkitbok kitrwiang ki la ïa synñiang pisa ban ai ïa ka kong Kmoiñ Wahlang kawei ka longkmie nongmareh thong kaba la paw ym tang hapoh ka South West Khasi Hills District hynrei wat ha ri India baroh kawei.

Lah ban kdew ba ka jingsynñiang pisa jong ka ophis PHE ka long ban kyrshan lem na ka bynta ka jingpynkhreh jong ka kong Kmoiñ Wahlang ha ka jingpynkhreh shwa ba kan leit sha ka jingïakop kaba dei ka 13th Pan Pacific Masters Games 2024 ka ban sa long ka Gold Coast, Queensland, Australia.

Haba kren ha ka jingïalang, u bah K. Nongbsaw, Executive Engineer ka PHE Mawkyrwat Division u la pynpaw ka jingaikhublei na ka bynta ka kong Kmoiñ Wahlang kaba watla hapdeng ka jingnoh ar sut jong ka met hynrei ka la long kawei na ki khlur nongmareh thong kaba la long ka nuksa ym tang ïa kiba ka heh la san hynrei ïa ki samla bad ki hep kiba rit.

“Kane ka jingsynñiang pisa jong ka ophis PHE ka long tang kum ka dak ba rit hynrei ngi kyrmen ba ha ka jingleit ïa shimbynta jong ka kong Kmoiñ Wahlang kan sa lah ban poi suk bad ban wan rah ruh ïa u soh jong ka jingjop haba ka la wan phai”, ong u bah Nongbsaw.

Ïa ka song pisa ba la dep ban ïa synñiang la aiti da u bah K. Nongbsaw, Executive Engineer ka PHE Mawkyrwat Division ha ryngkat ka jingsakhi lang ki nongtrei hapoh ka ophis jong u.